کرکٹ: امسالہ پی ایس ایل کے تمام میچ چار پاکستانی شہروں میں

پاکستانی دارالحکومت اسلام آباد سے یکم جنوری بدھ کے روز ملنے والی رپورٹوں کے مطابق پاکستان کرکٹ بورڈ مسلسل اس کوشش میں ہے کہ غیر ملکی کرکٹ ٹیموں کو اس بات کا قائل کیا جائے کہ وہ ماضی کی طرح اس جنوبی ایشیائی ملک کے دورے کریں کیونکہ پاکستان میں کرکٹ کھیلنا محفوظ ہے۔

پاکستان کرکٹ بورڈ (پی سی بی) کی طرف سے کیے گئے ایک اعلان کے مطابق اس سال پی ایس ایل کے تمام 34 میچ چار پاکستانی شہروں میں کھیلے جائیں گے۔ یہ شہر کراچی، لاہور، راولپنڈی اور ملتان ہوں گے۔ اس ڈومیسٹک ٹورنامنٹ کا آغاز 20 فروری کو ہو گا۔ لاہور میں، جہاں پی سی بی کے صدر دفاتر بھی ہیں، مجموعی طور پر 14 میچ کھیلے جائیں گے، جن میں 22 مارچ کو کھیلا جانے والا فائنل میچ بھی شامل ہو گا۔

پاکستان سپر لیگ کا پانچواں ایڈیشن

پی ایس ایل کا پہلا ایڈیشن 2016ء میں پورے کا پورا متحدہ عرب امارات میں کھیلا گیا تھا۔ 2017ء میں بھی یہ ٹورنامنٹ یو اے ای ہی میں کھیلا گیا تھا مگر اس کے فائنل کی میزبانی پاکستانی شہر لاہور نے کی تھی۔

2018ء میں اس ٹورنامنٹ کے چار میچ لاہور اور کراچی میں کھیلے گئے تھ اور باقی متحدہ عرب امارات میں۔ گزشتہ برس 2019ء میں ان مقابلوں کے آٹھ میچوں کی میزبانی کراچی نے کی تھی اور باقی میچ ایک بار پھر متحدہ عرب امارات میں ہی کھیلے گئے تھے۔

اس سال پی ایس ایل کے پانچویں ایڈیشن میں حصہ لینے والی کل چھ مقامی ٹیموں کے لیے کھیلنے والے غیر ملکی کھلاڑیوں کی تعداد 36 ہو گی۔ یہ کھلاڑی کوئٹہ گلیڈی ایٹرز، اسلام آباد یونائیٹڈ، ملتان سلطانز، کراچی کنگز، لاہور قلندرز اور پشاور زلمی کے لیے کھیلیں گے۔ ان غیر ملکی کرکٹرز میں انگلینڈ کے بیٹسمین جیسن روئے، جنوبی افریقی فاسٹ بولر ڈیل اسٹین، اور ویسٹ انڈین بیٹسمین لینڈل سائمنز بھی شامل ہوں گے۔

پاکستان میں انٹرنیشنل کرکٹ کی بحالی کی مسلسل کوششیں

پاکستان کافی عرصے سے یہ کوششیں کر رہا ہے کہ وہ غیر ملکی کرکٹ ٹیموں کو اپنے ہاں آنے اور انٹرنیشنل کرکٹ کھیلنے کی ترغیب دے سکے۔ پاکستان پر بین الاقوامی کرکٹ کے دروازے اس وقت بند ہو گئے تھے جب 2009ء میں لاہور میں سری لنکا کی قومی کرکٹ ٹیم پر حملہ کیا گیا تھا۔ اس حملے میں آٹھ مقامی افراد ہلاک ہوئے تھے جبکہ سری لنکا کے مہمان اسکواڈ میں شامل کئی کھلاڑی اور ٹیم اہلکار زخمی ہو گئے تھے۔

'ایک بڑی کامیابی‘

پاکستان کرکٹ بورڈ کے چیئرمین احسان مانی نے یکم جنوری کو جاری کردہ اپنے ایک بیان میں کہا، ''پاکستان میں کئی سال بعد کامیابی سے ٹیسٹ کرکٹ واپس لانے کے بعد اب یہ پاکستان کرکٹ بورڈ کے لیے ایک اور بڑی کامیابی اور بہت خوشی کی بات ہے کہ پی ایس ایل کا پورے کا پورا ایڈیشن بھی پاکستان ہی میں کھیلا جائے گا۔‘‘

پاکستان سپر لیگ کے 2020ء کے ایڈیشن کے کراچی میں کل نو میچ کھیلے جائیں گے، جن میں کوئٹہ اور اسلام آباد کے مابین ہونے والا افتتاحی میچ بھی شامل ہو گا۔ راولپنڈی میں، جہاں گزشتہ ماہ 2004ء کے بعد پہلی مرتبہ کوئی ٹیسٹ میچ کھیلا گیا تھا، پی ایس ایل کے آٹھ میچ کھیلے جائیں گے جبکہ ملتان اس ٹورنامنٹ کے تین  میچوں کی میزبانی کرے گا۔

م م / ا ا (اے پی)