کوسووو کے شہری اب بغیر ویزا شینگن زون کا سفر کر سکتے ہیں

کوسووو کے شہری ایک طویل عرصے سے یورپی یونین کی ویزا پالیسی میں کی جانے والی اس نرمی کا انتظار کر رہے تھے۔ وہ اب اس سہولت کو ایک بڑا ریلیف قرار دے رہے ہیں۔

یکم جنوری سے اس نئی پالیسی پر عمل درآمد شروع کیا گیا اور اس طرح اب کوسوو کے شہری شینگن زون میں 6 ماہ کے دوران ویزے کے بغیر 90 روز تک قیام کر سکیں گے۔ اس فیصلے کو کوسووو کے دارالحکومت پریشٹینا میں یورپی یونین کی رکنیت کی جانب ایک قدم کے طور پر دیکھا جا رہا ہے۔ سن 2008 میں پریشٹینا کی جانب سے ایک آزاد اور خود مختار ریاست ہونے کا اعلان کیا گیا تھا۔

 کوسووو کے ایک تاجر روشیت سوپی نے اے ایف پی کو بتایا "یہ ایک بہت بڑا ریلیف ہے، میں بہت اچھا محسوس کر رہا ہوں۔" روشیت کو اپنے کاروبار کے سلسلے میں باقدعدگی سے یورپ کا رخ کرنا پڑتا ہے۔ ان کا مزید کہنا تھا، "مجھے ہر مرتبہ تین سو یورو ویزا فیس ادا کرنی پڑتی تھی، جب میں نے اپنا پاسپورٹ تبدیل کیا تو میں نے حساب لگایا کہ میں یورپی یونین کو ویزا فیس کی مد میں  2،500 یورو ادا کر چکا ہوں۔"

 کوسووو کے شہری انتہائی جوش وخروش سے اس دن کا انتظار کر رہے تھے۔ پورے ملک میں اسے ایک تاریخی اقدام سمجھا جا رہا ہے کیونکہ شہریوں کا خیال ہے کہ اس طرح وہ یورپی یونین کے زیادہ قریب آگئے ہیں۔ ایک مقامی سروے میں شریک ہونے والے افراد نے اس سہولت میں تاخیر کی ذمہ داری برسلز اور پریشٹینا دونوں پرعائد کی ہے۔

1.8 ملین کی آبادی پر مشتمل کوسووو مغربی بلقان کا وہ آخری ملک ہے، جس کے شہریوں کو شینگن زون میں ویزا فری سفر کی یہ سہولت دی گئی ہے۔ اس سے قبل شمالی مقدونیہ، البانیہ، سربیا، مونٹی نیگرو اور بوسنیا ہیرسے گووینا کے شہری اس سہولت سے مستفید ہو رہے ہیں۔

یورپی یونین کی خارجہ پالیسی کے سربراہ جوزیف بوریل نے اسے اس بلاک کا ایک تاریخی فیصلہ قرار دیا ہے۔ وہ کہتے ہیں یہ کوسووو اور یورپی یونین دونوں ہی کے لیے سودمند ہو گا۔

پریشٹینا کے حکام کی جانب سے گزشتہ دو ماہ سے ایک مہم کے ذریعے لوگوں کو یہ بتایا جا رہا ہے کہ وہ ملازمت کی تلاش میں اس سفری آزادی کا غلط استعمال نہ کریں۔

یورپ میں انضمامی امور کے نائب سربراہ بیسنک بسلیمی نے ایک ممکنہ خطرے سے خبردار کرتے ہوئے کہا کہ ایسے کسی بھی قدم سے باز رہا جائے جو یورپی یونین کو ایسے اقدام کرنے پر مجبور کرے جو پورے ملک کے لیے نقصان دہ ثابت ہوں۔ ساتھ ہی انہوں نے ملک میں مزدوروں یعنی لیبر فورس کی شدید کمی کا خدشہ بھی ظاہر کیا ہے۔

پریشٹینا کے رینویسٹ انسٹیٹوٹ کے مطابق نجی شعبے میں کام کرنے والے 18 فیصد افراد اس سال ملازمت کی تلاش میں شینگن زون کے مختلف ممالک کی جانب ہجرت کرنے  کی کوشش کریں گے۔

 

ن ف⁄ ع ا (اے ایف پی)