کيا روس افغان طالبان کی مدد کر رہا ہے؟

افغان دارالحکومت کابل ميں روسی سفارت خانے کی جانب سے اتوار پچيس مارچ کے روز جاری کردہ ايک بيان ميں ايسے الزامات کو ’بے بنياد باتيں‘ قرار ديتے ہوئے مسترد کر ديا ہے۔ بيان ميں کہا گيا، ’’ہم ايک مرتبہ پھر اصرار کرتے ہيں کہ ايسے بيانات مکمل طور پر بے بنياد ہيں اور اہلکاروں سے اپيل کرتے ہيں کہ وہ بيکار کی باتيں نہ کريں۔‘‘

نيٹو کے جنرل جان نکلسن نے ايک برطانوی نشرياتی ادارے کو پچھلے ہفتے ديے اپنے ايک انٹرويو ميں کہا تھا کہ دہشت گردی و منشيات کے خاتمے جيسے مشترکہ مفادات کے باوجود روس، افغانستان ميں قيام امن کی امريکی کوششوں کو منفی طور پر متاثر کرنے کی کوششوں ميں ہے۔ ان کے بقول ايسے اشارے بھی ملے ہيں کہ روس افغان طالبان کی مالی معاونت کر رہا ہے اور انہيں اسلحہ بھی فراہم کر رہا ہے۔ جان نکلسن نے مزيد کہا، ’’ہمارے ہيڈ کواٹر ميں افغان رہنما ہتھيار لائے اور ان کا کہنا تھا کہ وہ ہتھيار روس نے طالبان کو فراہم کيے۔‘‘

امريکی کمانڈرز بشمول جنرل نکلسن پچھلے ايک سال کے دوران متعدد مرتبہ يہ الزام لگا چکے ہيں کہ امکاناً روس افغان طالبان کو ہتھيار فراہم کر رہا ہے تاہم فی الحال اس سلسلے ميں کوئی ٹھوس ثوابت سامنے نہ آ سکے ہيں۔ يہ امر بھی اہم ہے کہ برطانيہ ميں ايک سابق روسی ايجنٹ سيرگئی سکريپال کی حاليہ ہلاکت اور اس ميں مبينہ روسی کردار کے سبب ان دنوں يورپی يونين اور برطانيہ کے روس کے ساتھ تعلقات کافی کشيدہ ہيں۔ جنرل نکلسن کا بيان بھی اسی تناظر ميں کافی سخت تھا۔

دريں اثناء روسی حکام کا کہنا ہے کہ افغان طالبان کے ساتھ ان کے روابط يا بات چيت انتہائی محدود رہی ہے اور وہ امن مذاکرات کے مقصد کے ليے تھی۔ ماسکو کے بقول طالبان کے ساتھ بات چيت روسی شہريوں کی حفاظت کو يقينی بنانے اور طالبان کو مذاکرات کے ليے آمادہ کرنے کے ليے ہوئی تھی۔

ع س / ع ت، نيوز ايجنسياں