گوانتانامو کے ایغور قیدیوں کی سلوواکیہ منتقلی پر چین برہم

چینی وزارت خارجہ کی جانب سے جمعرات کے روز جاری کردہ اس بیان میں کہا گیا ہے کہ یوسف عباس، سعیداللہ خالق، اور حاجی اکبر عبدالغُپر ’حقیقی دہشت گرد‘ ہیں اور انہیں سلوواکیہ کے حوالے نہیں کیا جانا چاہیے تھا۔ امریکی انتظامیہ کی جانب سے کہا گیا تھا کہ گوانتانامو کے حراستی مرکز میں قید 22 ایغور نسل کے قیدیوں میں سے یہ آخری تین قیدی تھے اور یورپی ملک سلوواکیہ کی جانب سے ان قیدیوں کو قبول کرنے پر رضامندی کے بعد انہیں سلوواکیہ کے حوالے کیا جا رہا ہے۔ امریکی بیان میں کہا گیا تھا کہ یہ قیدی چین کے حوالے اس لیے نہیں کیے جا رہے، کیوں کہ وہاں انہیں مقدمات اور سزاؤں کا سامنا کرنا پڑ سکتا ہے۔

واضح رہے کہ ان قیدیوں کا تعلق چینی صوبے سینکیانگ سے ہے اور انہیں جلد ہی سلوواکیہ منتقل کر دیا جائے گا۔ سلوواکیہ کی وزارت داخلہ نے ان تین قیدیوں کی منتقلی کی اطلاعات کی تصدیق کی ہے۔

چینی وزارت خارجہ کے ایک ترجمان کے مطابق ان تینوں افراد کا تعلق مسلم انتہاپسند تنظیم مشرقی ترکستان تنظیم سے ہے۔ خیال رہے کہ اس علیحدگی پسند تنظیم کو بیجنگ حکومت دہشت گرد قرار دیتی ہے، ’’یہ حقیقی دہشت گرد ہیں۔ ان سے صرف چین کی سلامتی ہی کو نہیں بلکہ اس ملک کی سلامتی کو بھی خطرات لاحق ہوں گے، جو انہیں قبول کر رہا ہے۔‘‘

اس بیان میں مزید کہا گیا ہے، ’’چین امید کرتا ہے کہ سلوواکیہ ان دہشت گردوں کو سیاسی پناہ نہیں دے گا اور جتنا جلدی ممکن ہوا، چین کے حوالے کرے گا۔‘‘

چینی وزارت خارجہ کے ترجمان نے امریکی محکمہ خارجہ کی جانب سے سینکیانگ میں حالیہ پرتشدد واقعات کے دوران سکیورٹی فورسز کو برداشت کا مظاہرہ کرنے کی اپیل کو بھی مسترد کر دیا، ’’یہ بیانات حقائق پر پردہ ڈالنے کے مترادف ہیں۔ ہم امریکا سے مطالبہ کرتے ہیں کہ وہ دہشت گردی سے متعلق دوہرے معیارت ترک کرے اور فوری طور قول و فعل میں تضاد کو ختم کرے تاکہ پرتشدد دہشت گردوں کو غلط پیغام نہ پہنچے۔‘‘