ہرناز سندھو کون ہیں؟

اکیس سالہ ہرناز بھارتی صوبے پنجاب کے شہر چنڈی گڑھ میں پیدا ہوئیں۔ وہیں ان کی پرورش و پرداخت ہوئی۔ وہیں سے انہوں نے اسکول اور کالج کی تعلیم حاصل کی۔

نوجوان خواتین کو درپیش چیلنجز کے حوالے سے پوچھے گئے ایک سوال کے جواب میں ہرناز سندھو کا کہنا تھا، ''آج کے نوجوانوں پر سب سے بڑا دباؤ ان کی اپنی خود اعتماد ی کا ہے۔ یہ جاننا کہ آپ منفرد ہیں آپ کو خوبصورت بناتا ہے۔ خود کا دوسرے سے موازنہ کرنا بند کیجیے اورزندگی اور ضروری چیزوں کے بارے میں سوچیے۔‘‘

ہرناز سندھو نے بھارت کے لیے 21 برس کے وقفے کے بعد مس یونیورس کا اعزاز جیتا ہے۔ اس سے قبل سن 2000 میں لارا دتہّ  اور سن 1994میں سشمتا سین نے مس یونیورس کا خطاب جیتا تھا۔ دونوں بالی ووڈ کی اداکارہ ہیں۔

پیراگوئے کی نادیہ فریرا حسینہ کائنات کے 70 ویں مقابلے میں دوسرے نمبر پر رہیں۔ جنوبی افریقہ کی لالیلا مسوانے نے تیسری پوزیشن حاصل کی۔ جنوبی افریقی حکومت نے فلسطینیوں کی اپیل پر اس پروگرام کی سرکاری طورپر تائید نہیں کی تھی۔

ہرناز سندھو ماڈلنگ اور اداکاری کے میدان میں بھی سرگرم ہیں۔ وہ 'یاراں دیاں پو باراں‘  اور ' بائی جی کٹانگے' جیسی پنجابی فلموں میں بھی کام کرچکی ہیں۔

ہرناز سندھو سن 2017 سے حسن کے مقابلوں میں حصہ لیتی رہی ہیں اور کئی خطاب جیت چکی ہیں۔ سن 2017 میں ٹائمس فریش فیس مس چنڈی گڑھ منتخب ہوئی تھی۔ 2019 میں انہوں نے فیمینا مس انڈیا پنجاب کا خطاب جیتا تھا۔ سن 2019 میں ہی فیمینا مس انڈیا مقابلے میں چوٹی کے بارہ امیدواروں میں اپنی جگہ بنائی تھی۔