ہزارہا کشمیریوں پر بھارتی فوجی تشدد، ’اقوام متحدہ تفتیش کرے‘

بھارت کے زیر انتظام کشمیر کے دارالحکومت سری نگر سے پیر بیس مئی کو موصولہ نیوز ایجنسی اے ایف پی کی رپورٹوں کے مطابق ریاست میں انسانی حقوق کے تحفظ کے لیے سرگرم ان تنظیموں میں سے ایک تو (بھارت کے زیر انتظام) جموں کشمیر میں سول سوسائٹی کا اتحاد نامی تنظیم ہے جبکہ دوسری وہ ایسوسی ایشن ہے، جو پاکستان اور بھارت کے درمیان جموں کشمیر کے منقسم خطے کے بھارت کے زیر انتظام حصے میں اچانک لاپتہ ہو جانے والے کشمیریوں کے والدین نے قائم کر رکھی ہے۔

تشدد کی غیر اعلانیہ پالیسی

ان تنظیموں نے آج پیر بیس مئی کو جاری کردہ اپنی ایک مشترکہ رپورٹ میں کہا کہ بھارت کے زیر انتظام جموں کشمیر میں نئی دہلی کے مسلح دستے کئی برسوں سے ایک باقاعدہ لیکن غیر اعلانیہ پالیسی کے تحت کشمیریوں پر اس لیے تشدد کر رہے ہیں کہ یوں وہاں ’اپنے مکمل کنٹرول کو یقینی بنا سکیں‘۔

اس رپورٹ کے مطابق گزشتہ تین دہائیوں کے دوران بھارتی دستے کشمیر میں ہزارہا سویلین باشندوں کو تشدد کا نشانہ بنا چکے ہیں۔ ان شہریوں پر اتنی بری طرح تشدد کیا گیا کہ ایسے 432 مصدقہ واقعات کی باقاعدہ چھان بین کے دوران کم از کم 40 کشمیریوں کی ہلاکت کی تصدیق بھی ہو گئی۔

اس رپورٹ میں ان دونوں تنظیموں نے اقوام متحدہ سے مطالبہ کیا ہے کہ وہ بھارتی فوج کی طرف سے کشمیریوں پر کیے جانے والے مظالم کی باقاعدہ چھان بین کرائے۔ دوسری طرف اے ایف پی نے جب اس رپورٹ پر سرکاری ردعمل کے لیے بھارتی حکومت سے رابطہ کیا، تو کسی بھی تبصرے سے انکار کرتے ہوئے یہ کہا گیا کہ پہلے ملکی حکام اس رپورٹ میں لگائے گئے الزامات کا تفصیل سے جائزہ لیں گے۔

عوامی احتجاجی تحریک کے تیس سال

بھارت کے زیر انتظام جموں کشمیر میں سے کشمیر میں ان دنوں اس عوامی احتجاجی تحریک کے آغاز کی 30 ویں سالگرہ منائی جا رہی ہے، جو 1989ء میں شروع ہوئی تھی۔ بھارت کے زیر انتظام کشمیر پر نئی دہلی کی حکمرانی کے خلاف اس احتجاجی تحریک میں اب تک ہزارہا افراد مارے جا چکے ہیں اور ان ہلاک شدگان میں اکثریت عام شہریوں کی تھی۔

اس رپورٹ میں، جس کا عنوان ’تشدد: بھارت کے زیر انتظام جموں اور کشمیر پر کنٹرول کے لیے بھارتی ریاست کا ہتھیار‘ ہے، کہا گیا ہے کہ نئی دہلی کے مسلح دستے ریاست میں بھارتی حکمرانی کے خلاف مزاحمت کے خاتمے کے لیے تشدد کو بڑے منظم انداز میں ایک ہتھیار کے طور پر استعمال کر رہے ہیں۔

بجلی کے جھٹکے اور مصدقہ ہلاکتیں

رپورٹ کے مطابق انسانی حقوق کی ان دونوں تنظیموں نے جن 432 واقعات میں کشمیریوں پر فوجی تشدد کی چھان بین کی اور جن میں سے کم از کم 40 زخمیوں کی موت کی تصدیق بھی ہو گئی تھی، ان پر طرح طرح کے طریقوں سے تشدد کیا گیا تھا۔

تشدد کے ان طریقوں میں واٹر بورڈنگ، لوہے کی سلاخوں اور چمڑے کی بیلٹوں سے جسمانی طور پر پیٹنا اور جسم کے نازک حصوں کو بجلی کے جھٹکے دینا بھی شامل تھے۔

بھارت گزشتہ کئی دہائیوں سے اقوام متحدہ کے ان تفتیش کاروں کو جموں کشمیر کی منقسم ریاست کے اپنے زیر انتظام حصے میں جانے کی اجازت دینے سے انکاری ہے، جو وہاں انسانی حقوق کی خلاف ورزیوں اور مسلح دستوں کے ہاتھوں تشدد کے واقعات کی چھان بین کرنا چاہتے ہیں۔

م م / ک م / اے ایف پی