የፈረንሳይ ጦር ከኒዤር ለቅቆ እንዲወጣ ተገደደ

ፈረንሳይ በቀድሞ የአፍሪቃ ቅኝ ግዛቶቿ ላይ የነበራት ቀጥተኛ ወታደራዊ ተጽእኖ እና ተሳትፎ ቀስ በቀስ እየከሰመ የመጣ ይመስላል ።  በተለይ በኒዤር ከሁለት ወራት በፊት ወታደራዊ ሁንታው በዴሞክራሲያዊ መንገድ የተመረጡት የሀገሪቱ ፕሬዚደንት ሞሐመድ ባዞምን በመፈንቅለ መንግሥት ካስወገደ በኋላ የፈረንሳይ በአፍሪቃ ቀጥተኛ ወታደራዊ ተሳትፎ እያከተመ ነው ። የኒዤሩ መፈንቅለ መንግሥት ላለፉት 3 ዓመታት በመካከለኛው እና ምዕራብ አፍሪቃ ውስጥ ከተከናወኑ መፈንቅለ መንግሥታት ስምንተኛው መሆኑ ነው ።

ባለፈው ሳምንት ሰኞ በዋና ከተማዪቱ ኒያሚ በሺህዎች የሚቆጠሩ ሰዎች የፈረንሳይ ጦር ከሀገራቸው ለቅቆ እንዲወጣ በአደባባይ ሰልፍ ጠይቀዋል ። በኒዤር መፈንቅለ መንግሥቱ ከተደረገ ከሁለት ወራት በኋላም ፈረንሳይ ጦሯን ማስወጣት ጀምራለች ። የነዋሪዎቹ ጥሪ ምላሽ ማግኘት ይገባው እንደነበር አንድ የኒያሚ ነዋሪ ተናግረዋል ።

የሕዝቡ ጸረ ፈረንሳይ ንቅናቄና ጥላቻ

«የኒዤር ሕዝብ በአጠቃላይ የሆነ ኃይል መውጣት አለበት ብሎ ከወሰነ፤ ያ ኃይል መውጣት አለበት ። ያ ደግሞ የሕዝቡ ፍላጎት ነው ።  የሕዝብ ፍላጎት ሁሌም ሊከበር ይገባል ። »

የፈረንሳይ እና የጀርመንጦርን ጨምሮ የምዕራባውያኑ ወታደሮች ቀደም ሲል ወታደራዊ መፈንቅለ መንግሥት ከተከናወኑባቸው የኒዤር ጎረቤቶች፦ ማሊ እና ቡርኪናፋሶም ለቅቀው ለመውጣት መገደዳቸው የሚታወስ ነው ። ከቅርብ ጊዜያት አንስቶም በምዕራብ አፍሪቃ ሃገራት ፀረ ፈረንሳይ አቋሞች እና ጥላቻዎች ሲንጸባረቁ ተስተውለዋል። 

ኒዠር የዓለም ኃያላን የእጅ አዙር መፋለሚያ

ፈረንሳይ ኒዤር የሠፈሩ ከ1,500 በላይ ወታደሮችዋን ካለፈዉ ማክሰኞ ጀምሮ ከምዕራብ አፍሪቃዊቱ ሀገር ማስወጣት የጀመረችው ከኒዤር ወታደራዊ ሁንታ ከፍተኛ ግፊት ስለተደረገባት ነው ። በእርግጥ የፈረንሳይ ፕሬዚደንት ኤማኑዌል ማክሮ ጦራቸውን ከኒዤር እንደሚያስወጡ ከተናገሩ ሳምንታት ተቆጥረዋል ። የፈረንሳይ ጦር ከኒዤር ለቅቆ መውጣቱን ወታደራዊ ኹንታው ለኒዤር ሉዓላዊነት አዲስ ጅማሬ ብሎታል ።

የፈረንሳይ ጦር በ3 ሺሕ ኪሎ ሜትር ርቀት የምድር ጉዞው ብርቱ ፈተና ተደቅኖበታል

ከኒዤር የሚወጡ የፈረንሳይ ወታደሮችየጦር መሣሪያዎቻቸውን በብረት ለበስ ተሽከርካሪዎች ሲወጡ ወደብ እስኪደርሱ የቻድ ጦር ኃይል ያጅባቸዋል ተብሏል ። ጦር ሠራዊቱ ፈረንሳይ ለመድረስ ከኒዤር ከወጣ በኋላ በቻድ፣ በካሜሩን በኩል አቋርጦ ወደብ ለመድረስ 3 ሺሕ ኪሎ ሜትር ርቀት በአስቸጋሪ ሁኔታ መጓዝ ይጠበቅበታል ።  ከኒዤር በወታደራዊ አውሮፕላኖች መውጣት የቻሉት ጥቂት የፈረንሳይ ወታደራዊ መኮንኖች ብቻ ናቸው ። የፈረንሳይ ጦር የሚጓዝበት ቀጣና የፈረንሳይ ጦር ከዚህ ቀደም ሲወጋቸዉ የነበሩ አክራሪ ደፈጣ ተዋጊዎች የሸመቁበት ሊሆን ስለሚችል ለፈረንሳይ ጦር ጉዞውን አደገኛ እና አስቸጋሪ እንደሚያደርግበትም ተጠብቋል ።

ማንተጋፍቶት ስለሺ

እሸቴ በቀለ