«تاجیکستان حدود ۲۰۰ مهاجر افغان را اخراج کرده است»

به گزارش سایت انترنتی یورآسیا، مقام‌های تاجیکستان در سه هفته گذشته حدود ۲۰۰ مهاجر افغان را اخراج کرده‌اند. تعدادی از اخراج شدگان در شبکه‌های اجتماعی گفته‌اند که نیروهای امنیتی وارد منازل آن‌ها شده و به بهانه کنترول اسناد، آن‌ها را به مرز انتقال داده‌اند.

بیشتر بخوانید: تاجیکستان به دنبال تصرف کامل منطقه ناآرام در شرق این کشور است

سازمان‌های خیریه در تاجیکستان به مهاجران توصیه کرده‌اند که بدون نیاز عاجل، از خانه‌های خود بیرون نروند. گزارش شده که تعدادی از خانواده‌ها به سفارت افغانستان در تاجیکستان پناه برده‌اند که از سوی ماموران حکومت پیشین افغانستان اداره می‌شود.

خبرگزاری آسیا پلاس از قول وزارت داخله تاجیکستان نوشته است که مهاجران اخراج شده از قوانین تاجیکستان سرپیچی کرده بودند. به گفته مسئولان، تنها یک تن از مهاجران اخراج شده اسناد قانونی با خود داشته است.

بیشتر بخوانید: تاجیکستان برای مهاجران احتمالی افغانستان اردوگاه ساخته است

با این حال تلویزیون طلوع افغانستان از قول مهاجران مقیم تاجیکستان گزارش داده است که تعدادی از مهاجران با وجود داشتن اسناد قانونی به افغانستان برگردانده شده‌اند.

یک زن مهاجر افغان به این شبکه گفته است که مقام‌های تاجیکستان هفته گذشته شوهرش را که اسناد قانونی داشت اخراج کردند. این خانواده از چهارسال به این سو در تاجیکستان زندگی می‌کند.

سازمان ملل متحد در هفته اخیر ماه اگست از اخراج مهاجران از تاجیکستان اظهار نگرانی کرد و از مقام‌های این کشور خواست که اخراج‌ها را متوقف کنند.

منبع: رسانه همکار ما اینفومایگرانتس