Ambaliyar ruwa ta halaka mutane 188

Adadin mutanen da ambaliyar ruwa ta halaka a kasar Kenya sun kai 188 tun daga watan Maris, yayin da wasu mutanen kimanin 90 suka bace ake ci gaba da nema. A wannan Alhamis ma'aikatar cikin gida ta kasar ta tabbatar da wannan alkaluman. Akwai kuma mutane 125 da suka samu raunika. Fiye da mutane dubu-165 suka rasa gidajensu sakamakon bala'in.

Ruwan sama da ake ci gaba da shekawa babu kakkautawa, ya haifar da ambaliyar ruwa gami da zabtarewar kasa a Kenya da sauran kasashen gabashin Afirka. Tuni gwamnatin Kenya ta bai wa sojoji umurnin kwashe mutanen da suke fuskantar wannan ambaliyar ruwa.