Jamus na nazarin sassauta tarnakin corona

Cibiyar binciken kimiyya da yaki da cutattuka masu yaduwa ta Jamus ta bada shawarar sassauta tarnakin harkokin jama'a a kasar sakamakon raguwar yaduwar cutar coronavirus a fadin tarayyar Jamus.

Shugaban cibiyar Robert Koch ta yaki da cutattuka Farfesa Lothar Wieler ya ce gwamnati na iya bude makarantu a lokaci guda kuma a cigaba da sa ido kan matakan tsabatar muhalli.

"Yace bayananmu sun nuna ba a sami karuwar mutane da yawa da suka kamu da cutar a tsawon lokaci wanda hakan ke nufin cewa matakan da ake dauka suna yin tasiri kuma wannan labari ne mai kyau".

Bugu da kari ya ce ana iya bude shagunan sayar da kayayyaki da wuraren cin abinci idan aka cigaba da sa ido da martaba matakan tazara a tsakanin jama'a

Sai dai kuma yace akwai bukatar gwamnati ta bullo da dokar amfani da kyalen rufe baki da hanci ga al'umma idan suka fita bainar jama'a.