Jimamin mutuwar Dilip Kumar

Firaiminista Narendra Modi ya mika sakon ta'azziyarsa ga al'ummar kasar Indiya bisa rashin shahararren jarumin fina-finan kasar Dilip Kumar, da ya mutu yana da shekaru casa'in da takwas a duniya a wannan Laraba. Jarumin ya mutu ne bayan ya sha fama da rashin lafiya a wani asibiti da ke birnin Mumbai.

Za dai a ci gaba da tunawa da jarumin da ya kwashi fiye da shekaru sittin yana fitowa a fina-finan Indiya daban-daban, da muhinmiyar rawar da ya taka a ci gaban masana'antar Bollywood. Fim din Dilip Kumar na farko shi ne Jugnu kuma na karshen shi ne Qila da yayi a shekarar alif da dari tara da casain da takwas.