Kotun MDD ta umurnci Isra'ila ta kare fararen hula a Gaza

Alkalan kotun na kasa da kasa 15 sun amince da daukar matakan kare kisan kare dangi a kan Falasdinawa kana biyu suka yi adawa. 

Kotun ta ce ta amince da hakkin Falasdinawa a Gaza na samun kariya daga aikata kisan kare dangi, saboda Falasdinawa na a matsayin wata kungiya da ke bukatar kariya a karkashin yarjejeniyar kisan kare dangi.

Hukuncin na wannan Juma'a a birnin Hague da hankalin duniya ya karkata akai, bai shafi ainihin zargin da ake yi wa Isra'ila ba, na ko kisan kare dangi ya faru-ko kuma akasin haka, sai dai ya bukaci gaggauta tsagaita wuta kamar yadda Afirka ta Kudu ta nema.