Maniyyata sun fara gudanar da aikin Hajjin bana

Ana sa ran fiye da mutane miliyan biyu da dubu dari biyar daga kasashe 160 na duniya ne za su sauke farali a kasa mai tsarki a wannan shekarar.

Hukumar kula da aikin Hajji da Umra ta Saudiya ta ce idan har komai ya tafi yadda aka tsara, a bana za a gudanar da aikin Hajji mafi yawan al'umma cikin tarihi.

Hakan dai zai samu ne sakamakon wannan shi ne karon farko da za a gudanar da aiki hajji tun bayan shekarar 2019 ba tare da dokokin corona ba.

A daren jiya Lahadi ne dai, maniyatan suka fara tafiya wuraren ibada da suka hada da Mina daga masallacin Harami gabanin ranar hawan Arfa a gobe Talata.

Hukumomi sun ce an tanadar da abinci da kuma karin jami'an tsaro a Mina, birnin mafi yawan tantuna a duniya. Aikin hajji na daga cikin shika-shikan musulumci guda biyar, da ya wajaba a kan ko wane Musulmi a kalla sau daya a rayuwarsa idan yana da iko.