Najeriya: An dakile harin ta'addanci

Dakarun sojin Najeriya sun yi musayar wuta da mayakan na Boko Haram a lokacin da suka doshi wani shingen bincike a motocinsu kirar a kori kura inda a nan ne sojojin suka mayar da martani suka kuma yi nasarar fatatakar mayakan a cewar wani babban hafsan sojin rundunar sojin ta yankin arewa maso gabashin kasar Nicholas Rogers. Duk da cewar ba a samu asarar rai ba bisa nasarar da aka samu kan mayakan, an karfafa tsaro a duk fadin yankin da ya sha fama da ayyukan kungiyar. Mutane fiye da miliyan biyu rikicin Boko Haram ya raba da matsugunansu baya ga dubban da suka rasa rayukansu a shekaru takwas na ayyukan kungiyar ta Boko Haram a Najeriya.