Tsohon dan wasan Kurket ya kama hanyar zama firamnista
July 27, 2018
Kwanaki biyu aka kwashe ana kidayar kuri'un a zaben da masu sa ido kan harkokin siyasa suka ce ba a taba ganin irinsa a shekarun baya bayan nan ba, ganin yadda jama'a suka jure dogon layi don samun damar kada kuri'a duk kuwa da fargabar aukuwar hari irin na ta'addanci da kasar ke fuskanta.
Gwarzon tsohon dan wasan Kurket na duniya, Imran Khan da ya lashe zaben, ya yi godiya ga milyoyin magoya baya inda ya ce nasarar ba ta jam'iyyarsa ta PTI kadai ba ce amma ta mutanen kasa ce baki daya.
Sai dai jim kadan da hukumar zaben kasar ECP ta ba da sakamakon, jam'iyya mai mulki ta PML-N, ta yi kalubalanci sakamakon tana mai zargin an tafka magudi. Hukumar zaben ECP ta yi watsi da zargin cewa an tafka magudi a zaben, ta daura alhakin jinkirin da aka samu na bayyana sakamakon zaben a kan wasu matsaloli da suka shafi na'ura.
Rashin samun rinjaye na kujerun 'yan majalisar dokoki na daya daga cikin kalubalen da sabon firaiminstan zai fuskanta.