Scholz ya bukaci Turai ta kera makamai masu yawa

Shugaban gwamnatin Jamus Olaf Scholz ya ce wajibi ne nahiyar Turai ta habaka kera makamai masu tarin yawa kuma cikin gaggawa, yana mai gargadin cewa a yanzu nahiyar ba zaune ta ke cikin kwanciyar hankali ba.

Da yake jawabi yayin ziyarar da ya kai kamfanin kera makamai na Rheinmetall Scholz ya ce wajibi ne kasashen Turai su hada karfi wajen samar da kudade da kuma yin odar makaman domin bai wa kamfanin tabbacin sayen makamai cikin shekaru goma masu zuwa.

Scholz ya ce yin hakan ya zama wajibi saboda takaicin abin da ke faruwa a zahiri na rashin zaman lafiya a turai, yana mai nuni da yakin Rasha a Ukraine.