Мобилизација: На Русија ѝ требаат „пресни“ војници

Москва сака да мобилизира што повеќе сили за голема офанзива, предупреди неодамна украинскиот претседател Володимир Зеленски во својата вечерна видео-порака. А непосредно по Нова година, украинскиот министер за одбрана Алексеј Резников им се обрати на Русите и ги предупреди дека Кремљ се спрема за нова мобилизација и сака дури да воведе воено право во Русија и да ги затвори границите на земјата за мажите.

Официјално, делумната моблизација во Русија почната на 21 септември 2022 година, уште не е завршена. Тоа би било можно само доколку претседателот Владимир Путин потпише соодветен указ, што до денес не се случи. 

„Ова не е делумна мобилизација“

„Навистина гледаме дека нема декрет за завршување на мобилизацијата. Првиот бран беше во октомври и тоа не е делумна мобилизација. Се известува дека луѓето во одреден број региони и натаму добиваат повици. Можеби Министерството за одбрана уште собира некои специјалци, во секој случај, мобилизацијата уште не е завршена“, вели Сергеј Кривенко, шеф на руската група за човекови права „Граѓани, војска, право“. Руските власти оваа организација ја ставија на листата на т.н. „странски агенти.“

Кривенко потсетува на указот на Путин од август 2022 година, кој зборува за зголемување на руските оружени сили на преку 1,5 милиони војници.

„Многу експерти во тоа време во Русија избројаа вкупно околу 800.000 воени лица – воени обврзници, професионални војници, офицери и учесници во војната. А со есенската мобилизација тој број е зголемен за 300.000 луѓе. Потоа, во декември 2022 година, рускиот министер за одбрана Сергеј Шојгу најави покачување на оружените сили на 1,5 милиони, вели Кривенко, што значи натамошно зголемување од 400.000 луѓе. „Ова е подготовка за мобилизација. Мислам дека вториот бран треба да го очекуваме на крајот на јануари или во февруари.“

Половина од првобитно мобилизираните веднаш се испратени на фронт, втората половина во центрите за обука. „Се спремаа неколку месеци. Кога ќе почне офанзива за која зборуваа и Путин и министерот за одбрана, овие војници веднаш ќе бидат испратени во акција. Наскоро ќе бидат потребни уште повеќе луѓе, така што мора да се преземе нов бран мобилизација за регрутите повторно да можат да се подготвуваат неколку месеци“, вели рускиот активист за човекови права.

„Државата има отворени опции“

Московскиот воен експерт Јан Матвејев на почетокот на декември даде слична изјава за Дојче веле: „Прво, нема јасни знаци дека државата се откажа од продолжување на мобилизацијата. Таа ги држи сите опции отворени. И второ, постои практична причина: руските војници гинат во голем број или се ранувани на првата линија на фронтот. Ова посебно важи за мобилизираните, зашто се лошо подготвени. Така, ќе мора да бидат земенети.“

Овој експерт како трета причина за нов бран мобилизација го наведува и тоа што Путин нема намера да ја заврши војната: „Ќе продолжи ако ништо не го спречи. За ова е потребна резерва за во иднина – за војна е потребенпостојан прилив, како на ресурси, така и на луѓе.“

„Најмалку уште половина милион војници“

„Ќе има втор, можеби и трет бран мобилизација, зашто ќе бидеме принудени на тоа“ изјави на крајот на декември бившиот „министер за одбрана“ на т.н. „Доњецка Народна Република“, Игор Гиркин, познат и како Стрелков. „За да победиме во Украина, мораме да мобилизираме уште најмалку половина милион војници. А дури и ако немаме волја за победа, ќе мораме да извршиме делумна мобилизација“. Рускиот политиколог Станислав Белковски на својот канал на Телеграм постави снимка на изјавите на Гиркин. Гиркин верува дека ќе има уште една мобилизација во јануари или на 24 февруари, на годишнината од „специјалната воена операција“.

Но, руски претставници ги негираат тие планови. „Не гледам потреба да се нареди уште една фаза на мобилизација во наредните шест месеци“, изјави Андреј Гурулев, член на Одборот за одбрана во руската државна Дума во интервју за порталот „chita.ru". „За тоа нема потреба. И нашата индустрија исто така мора да биде во состојба да обезбеди уште еден бран мобилизација. Според мое мислење, едноставно е неефикасно да се направи ова во наредните шест месеци.“