Вучиќ: Досега предадени над три илјади парчиња оружје

Граѓаните на Србија досега предале повеќе од три илјади парчиња нелегално оружје и десетици илјади парчиња куршуми и експлозивни средства, изјави српскиот претседател Александар Вучиќ за телевизијата Пинк.

„Тоа е добра вест, затоа што за толку пати е намален ризикот за граѓаните на Србија. Сега добивам писма во кои ми велат дека не убива оружјето, туку криминалниот ум, но очигледно не можеме веднаш да откриеме кои се тие умови, затоа е ова важна акција и добро е што ја покренавме оваа акција“, рече Вучиќ и посочи дека е подготвен да ја „плати политичката цена“ за тие потези.

Според податоци на српските власти, во земјата која брои 6,8 милиони жители, се регистрирани 760.000 парчиња огнено оружје. Од истражувачкиот проект Small Arms Survey, пак, произлегува податокот дека 39 проценти од населението во Србија има оружје, што е највисока стапка во Европа.