Коронавирус: Почнаа острите рестриктивни мерки во Германија

Вчерашниот ден беше полн со стрес за Валентино од берберницата „Gentlemen's Circle“ во центарот на Берлин. Телефонот не престануваше да ѕвони, многу пропуштени повици од муштерии кои сакаа во последен момент да се потстрижат и да ја средат брадата. „Само стрес, само стрес“, вели берберот Валентино.

Од денеска фризерниците и салоните за убавина повторно се затворени. Одлука која за многумина во оваа бранша дојде неочекувано. Само пред неколку недели министерот за здравство тоа го оцени како неверојатно. Но, во неделата (13.12.2020), канцеларката Меркел и покраинските премиери одлучија - мора да се затвори до 10 јануари. Кој сакаше да се потстриже, имаше два дена на располагање.

Исто толку време остана и за купување подароци. На пет минути пеш од берберницата „Gentlemen's Circle“, на Фридрихштрасе, вчера имаше долга редица луѓе пред стаклените врати на голема книжарница. Жена диригираше со процесот на влез и излез. Расположението - агресивно. Оној кој се нашол на патот, добива прашања со нервозен тон - дали стои во редица за чекање или не.

Губитници од кризата

Продавниците за дневни потреби, како што се продавниците за храна, се и натаму отворени. Но, за остатокот од трговијата на мало и фризерите, вториот „локдаун“ во оваа година на пандемија претставува горчлив рез. Тоа е нормално, зашто декември за фризерниците и салоните за убавина е месец во годината со најголем промет, бидејќи многумина се разубавуваат пред празниците, вели Јерг Милер, раководител на Централното здружение на германските фризери, кој деновиве е цитиран во многи медиуми. Многу фризерници го продолжија работното време со цел да опслужат што повеќе муштерии. Здружението за целата година очекува намалување на продажбата за околу 30 проценти. „Овој втор локдаун го загрозува постоењето на нашиот занает“, вели Милер. Треба да има економска помош, но кога таа ќе пристигне се' уште не се знае.

Ваквата несигурност им е и тоа како позната на гастрономите. Рестораните, баровите и кафулињата мораа да се откажат од нормална работа уште во ноември. Требаше да добијат великодушна „ноемвриска помош'. Но, досега многумина имаат добиено само дел од средствата. Тоа го потврдува и сопственикот на „Гранд кафе“ во центарот на Берлин. Дозволено е само продавање „To-Go“, значи за земање.

Крај на бумот на варено вино

Многу гастрономи тоа го искористија и продаваа варено вино, кое инаку радо се пие на божиќните панаѓури, кои сега се затворени. Тоа наиде на добар одек кај муштериите. На некои улици во Берлин има цели низи тезги за продавање варено вино.

Но, со новиот „локдаун“ се забранува и продажба на алкохол на улица. „Тоа е навистина неубаво“, вели продавачот на варено вино од „Grand Café“ облечен како Дедо Мраз. Со продавање варено вино барем добивал малку бакшиш, вели овој келнер, кој како и многу негови колеги практично живее од бакшиш, со оглед на тоа дека платите во гастрономијата се ниски. Неговиот шеф е поопуштен. Годинава е лошо, наредната ќе биде иста таква, но тој тврди дека гледа напред.

Нема панично купување

Во шопинг-зоната околу Александерплац во изминатите денови имаше помалку купувачи отколку во други делови на Берлин. Тоа го покажуваат податоците на фирмата Хајстрит, специјализирана за мерење на фреквенција на муштерии. Но, и во другите делови на Берлин бројот на муштерии е просечен, и тоа кусо пред Божик. Лаже ли впечатокот со долгата редица пред книжарницата на Фридриштрасе? Се' уште не може да се каже со сигурност колкав бил бранот купувачи непосредно пред новиот „локдаун“. „Највносната фаза на крајот на годината, за многу трговци ќе се претвори во фијаско“, предвидува Штефан Гент од Здружението на германската трговија.

„Бранот од понеделникот беше нешто помал во вторникот“, вели берберот Валентино во „Gentlemen's Circle“, додавајќи дека „локдаунот“ дошол многу краткорочно. Тој лично смета дека бројките на инфицирани ќе почнат вистински да се намалуваат дури на крајот на јануари, зашто токму во деновите на турбо-шопинг многумина се имаат заразано со коронавирус.