Путин во Русија воведува ИнтерЊет
1 ноември 2019
Руската влада сака да создаде инфраструктура за суверен интернет и истиот го претставува како неопходна одбрана од сајбер напади од странство. Критичарите, како рускиот интернет експерт Александер Исавнин, велат дека мерката е уште еден чекор кон целосна техничка контрола врз интернетот.
За разлика од досега кога руските интернет провајдери функционираа според слободни пазарни услови, сега руската држава може да преземе директна контрола, вели Исавнин.
Рускиот интернет сообраќај во иднина ќе биде насочуван преку центри во самата земја, за што допрва ќе се гради инфраструктурата. Интернет провајдерите ќе мора да ја инсталираат потребната опрема за спроведување на транзицијата.
Организацијата Репортери без граници оценува дека мерката ќе ја зголеми цензурата на интернет и ќе ги наруши основните човекови права. Бројни политички опозициски интернет страници веќе се блокирани. Многу Руси стравуваат дека земјата ќе стане дигитално изолирана со зголемен надзор од страна на државните безбедносни служби.
Илјадници луѓе демонстрираа против законот, кој Путин го потпиша во мај. Руската влада ги отфрла критиките. Портпаролот на Путин, Дмитриј Песков вели дека Русија не се подготвува да се исклучи од глобалната мрежа, туку се подготвува за можноста дека Западот би можел да ја исклучи. Путин тврди дека се работи за прашање на националната безбедност.