Шпанија воведува „безусловна основна плата“

Почнувајќи од јуни, во Шпанија се воведува „основна плата“, според одлука на владата во Мадрид, донесена денеска, како мерка за амортизирање на економските последици од пандемијата на коронавирус. „Денеска е историски ден за нашата демократија, во Шпанија се воведува ново социјално право", изјави Пабло Инглезијас, шеф на левичарскиот сојуз Подемос и заменик-премиер.

Коалицијата составена од социјалдемократски ориентираната ПСОЕ и левичарскиот Подемос уште на крајот на минатата година постигна согласност за воведување основен месечен приход, но без временска рамка. Корона-кризата ја принуди владата да го забрза спроведувањето на договорената мерка, истакна Инглесијас.

Повеќе:

Коронавирус: Десетпати повеќе инфицирани во Шпанија?

Корона-криза: Позитивно обоено неединство во ЕУ

Европа поделена на „север и југ“ опасно танцува на чекор од амбисот

Од „безусловната основна плата“, според проценките на владата, ќе профитираат околу 850.000 домаќинства во криза. Тоа изнесува околу 2,3 милиони од вкупно 50 милиони жители на Шпанија, а околу 30 процентиод нив се младинци и деца. Полнолетен возрасен жител има право на 462 евра месечно. Семејствата ќе добиваат дополнително 139 евра по член, но максимално 1015 евра по домаќинство.

На ваков начин, смета владата, секое домаќинство ќе располага со „гарантиран просечен годишен приход од 10.070 евра." Се проценува новиот социјален издаток да ја чини владата околу три милијарди евра годишно.

Поради корона-кризата стотици илјади Шпанци го загубија работното место, стапката на сиромаштија доживува рапиден скок. Податоците со кои располага владата велат дека околу 1,6 милиони луѓе во Шпанија се загрозени од екстремна сиромаштија.