ایران: د افغانستان د حل لاره د یوه ټول شموله حکومت جوړول دي
۱۴۰۲ تیر ۱۵, پنجشنبه
د جنبش عدم تعهد د بهرنیو چارو وزيرانو غونډه د چهارشنبې په ورځ د اذربایجان په پلازمینه باکو کې د «قانون او عدالت د حاکمیت» تر عنوان لاندې جوړه چې د افغانستان په اړه بحث شوی دی.
په دغه کتنه کښې د ایران د بهرنیو چارو وزیر امیر عبداللهیان وویل چې په سیمه کښې د لازیاتې هماهنګۍ د ټینګولو له پاره د ایران د ګاونډیتوب سیاست خپله بریا ثابته کړې ده. هغه زیاته کړه چې دوی هوډ لري چې د نړۍ له ټولو ګاونډیانو او هېوادونو سره د اړیکو او همکاریو هراړخیز پرمختګ ته دوام ورکړي.
اړوند مطالب:هند: د شانګهای سازمان دې له ترهګرۍ سره مبارزه او افغانستان سره مرسته وکړي
عبداللهیان د افغانستان په اړه وویل، د افغانستان خلک له څو لسیزو راهیسې له بې ثباتۍ او یوه بحران سره لاس او ګرېوان دي او د دغه بحران د حل لاره د افغانستان د ټولو قومونو په ګډون د یوه جامع او ټول شموله حکومت جوړول دي.
د ایران د بهرنیو چارو وزیر د وینا په متن کې چې د دغه وزارت په ویب پاڼه کې خپره سوې، ویل سوي دي چې عبداللهیان له نړیوالې ټولنې غواړي ترڅو د افغانستان کنګل سوې پیسې ورته خوشي کړي او د افغانانو د مالي سرچینو د غصب مخه ونیسي.
اړوند مطالب :د آلمان پخوانی خارجه وزیر: افغانستان به ناامنه پاتې وي
عبداللهیان په دې غونډه کې د افغان کډوالو په اړه هم خبرې وکړې او ویې ویل چې ایران به د میلیونونو افغان کډوالو په کوربه توب سره په افغانستان کې د بشري وضعیت د ښه والي له پاره خپلو هڅو ته دوام ورکړي.
خو په ايران کې مېشت افغان کډوال تل د دغه هيواد د امنيتي ځواکونو او خلکو له لوري پر محدوديتونو او ناوړه چلند نيوکه کوي او وايي چې ډېر کډوال په وېره او پټه کې ژوند کوي څو د ایران حکومت یې بېرته افغانستان ته ستانه نه کړي.
د طالبانو له ادارې سره د ایران اړیکې په تېرو دوو کلونو کې ښې وې. تهران حتی د طالبانو ډیپلوماتان منلي او په ایران کې یې د افغانستان سفارت او قونسلګرۍ طالبانو ته تسلیم کړې دي.
اړوند مطالب:طالبانو د القاعدې په هکله د بایدن وروستۍ خبرې د «حقیقت درک» بللي
خو په تېره یوه میاشت کې د ایران او طالبانو ترمنځ اړیکې د اوبو د حق آبې پر سر سړې سوې او حتی د ایران د سرحدي ځواکونو او طالبانو ترمنځ د وسله والي نښتي لامل سوې.
د شانګهای د همکارۍ سازمان غړو هيوادونو د جولای مياشتي پر ۴مه د یوې اعلامیې په خپرولو سره ویلي چې په افغانستان کې د یوه ټول شموله حکومت رامنځته کېدل اړین دي.
ص.ذ/ن.ز