سیمې ته د بي ۵۲ الوتکو رسیدل او ایران ته د امریکا خبرداری
۱۴۰۳ آبان ۱۳, یکشنبه
د امریکا متحده ایالاتو د ولسمشریزو ټاکنو په درشل کې او د اسرائیل وروستیو بریدونو ته د «قطعي ځواب» ورکولو په هکله د ایراني چارواکو له څرګندونو په پام کې نیولو سره، واشنګټن تهران ته د دا ډول یوه اقدام له کبله خبرداری ورکړی دی.
د «اکسیوس» انټرنټ پاڼې په خپل رپوټ کې د یوه امریکایي چارواکي او په اسرائیل کې د یوه پخواني مسئول چارواکي په نقل لیکلي دي، که ایران لکه څنګه چې یې اعلان کړی دی یو وار بیا پر اسرائیلو برید وکړي د امریکا حکومت به ونه توانیږي «دغه هیواد د ایران په مقابل کې له زغم څخه کار اخیستنې ته قانع کړي.»
اسرائیلۍ انټرنټ پاڼې "والا" (Walla) چې د جروزالم پوست نشریې پورې تعلق لري هم رپوټ ورکړی دی چې د امریکا حکومت دغه خبردارۍ د سویسي دیپلوماتانو په وسیله ایراني چارواکو ته رسولی دی. په پيغام کې ویل شوي چې واشنګټن به د ایران د نوې حملې په صورت کې اسرائیل یو ځل بیا دې ته وهڅوي څو یوازې «محدود او دقیق برید ترسره کړي.»
د رسنیو د رپوټونو له مخې دا ډول خبرداری د واشنګټن او تهران په ارتباطاتو کې بې ساری تماس بلل کیږي.
سیمې ته د بي ۵۲ الوتکو رسیدل
دغه رپوټونه په داسې یوه وخت کې خپریږي چې د امریکا د قوماندې مرکز(سنتکام) په ایکس شبکه کې سمیې ته د بي ۵۲ ډوله جنګي بم غورځونکو الوتکو د داخلیدو خبر ورکړی دی.
د استول شویو الوتکو د شمیر په هکله څه نه دي ویل شوي، یوازې همدومره ویل شوي چې دغه الوتکې په نورث داکوتا ایالت کې له «مینوت» هوایي اډې څخه د سیمې پر لور روانې شوې دي.
مخکې تر دې د امریکا د دفاع وزارت (پنټاګون) د یوې اعلامیې په ترڅ کې ویلي وو چې په منځني ختیځ کې د مستقرو امریکایي ځواکونو د حفاظت، د اسرائیل د ملاتړ او همدارنګه د یوه پوځي شخړې رامنځته کیدو د مخنیوي او تاوتریخوالي د کمولو له پاره، څو ستراتیژیک بم غورځوونکي الوتکې او د بالستیک توغندیو ضد بیړۍ منځني ختیځ ته استوي.
په همدې هکله د پنټاګون ویاند پاتریک رایدر، ویلي وو چې د امریکا متحده ایالات د دفاع وزیر لوید آستن په امر اراده لري چې څو بي ۵۲ ډوله الوتکې او د بالستیک توغندیو ضد دفاعي بیړۍ او همدرانګه د سون موادو رسوونکي الوتکې سیمې ته واستوي.
د ایران «قاطع ځواب»
د شنبې په ورځ د ایران مذهبي مشر علي خامنه اي، یو وار بیا امریکا او اسرائیل ته ګواښ وکړ چې دغه هیوادونه باید د ایران له خوا «قاطع او غاښ ماتونکي ځواب» ته په تمه اوسي.
خامنه اي همدارنګه ادعا وکړه چې ایران د پوځي او وسلو له پلوه خپله بشپړه او لازمه امادګي نیولې ده.
مخکې تر دې د سپاه پاسداران یو شمیر مسئولینو هم ګواښ کړی و چې ایران به د اسرائیل برید بې ځوابه نه پریږدي.
اکسیوس انټرنټ پاڼې د جمعې په ورځ د دوو باخبره اسرائیلي سرچینو په حواله رپوټ ورکړی وو چې د دغه هیواد د استخباراتي ارزونو له مخې ایران په راتلونکو ورځو کې د عراق له خاورې څخه پر اسرائیل د حملې کولو له پاره د امکاناتو د برابرولو په حال کې دی.
آژانسونه: ش.ن/ ا.و.ا