شمالي کوریا له روسیې سره دفاعي تړون تصویب کړی دی
۱۴۰۳ آبان ۲۲, سهشنبه
د شمالي کوریا دولتي رسنیو د سه شنبې په ورځ (د نومبر میاشتې ۱۲ نیټه) رپوټ ورکړی دی چې هیواد یې له روسیې سره دوه اړخیز دفاعي تړون تصویب کړی دی. د دې موافقې پر اساس له دواړو خواو څخه د وسله وال برید په صورت کې د یوه بل مرستې ته د رسېدلو غوښتنه شوې ده.
د اوکراین د دفاع وزارت په دې وروستیو کې دا خبره تائیده کړې وه چې د روسیې په سرحدي سیمه کورسک کې یې د شمالي کوریا له ګومارل شویو پوځي واحدونو سره د ځواکونو نښتې شوې دي، چې تر هغې څو ورځې وروسته د دې موافقې اعلان وشو.
د شمالي کوریا رسنیو د تړون په هکله څه ویلي؟
د شمالي کوریا د دولتي رسنۍ یوه چارواکي وویل چې د شمالي کوریا د رهبر کم جونګ اون د «حکم په توګه دغه تړون تصویب شوی دی.»
آژانس ویلي دي: «تړون به له هغې ورځې څخه د اجرا وړ وي، چې دواړو اړخونو د موافقې اسناد تبادله کړي دي.»
تیره اونۍ د روسیې قانون جوړوونکو هم د دغه تړون په حق کې رایه ورکړې وه، چې تر هغې وروسته د روسیې ولسمشر ولادیمیر پوتین، هغه لاسلیک کړ. اوس شمالي کوریا د دې تړون د تصویبولو اعلان کړی دی.
پوتین په جون میاشت کې پیونګ یانګ ته د خپل سفر پر مهال له شمالي کوریا سره د ستراتیژیک مشارکت تړون لاسلیک کړی و. په دې تړون کې دا شرط هم ایښودل شوی و چې که په یوه له دغو دواړو هیوادونو برید وشي، نو دویم هیواد به ورته «بې له ځنډه» پوځي مرسته رسوي.
شمالي کوریا روسیې ته خپل عسکر استولي
د شمالي کوریا د بهرنیو چارو وزیر چون سون هویې، په دې وروستیو کې د مسکو دوره کړې وه او د اوکراین پر ضد یې د روسیې جګړه د «مقدس کوښښ» په بللو سره ویلي و چې پیونګ یانګ به «د بریالیتوب تر ورځې پورې له خپلو روسي دوستانو سره په کلکه ودریږي.»
سویلي کوریا، اوکراین او لویدیځ هیوادونه وایي چې شمالي کوریا په دې جګړه کې د روسیې د ملاتړ له پاره خپل نږدې ۱۰۰۰۰ عسکر په روسیه کې ګومارلي یا ځای پرځای کړي دي.
لویدیځ هیوادونه له اوږدې مودې راهیسې پر پیونګ یانګ دا تور هم لګوي چې د اوکراین پر وړاندې جګړه کې مسکو ته د توپخانې مرمۍ او توغندي هم ورکوي.
تیره اونۍ د «جي۷» ډلې هیوادونو د پیونګ یانګ او مسکو تر منځ مخ پر ډیریدونکې همکاري وغندله او اندېښنه یې څرګنده کړه چې د شمالي کوریا پوځ د ملګرو ملتونو د امنیت شورا د تړونونو په نقضولو سره د بالستیک توغندیو د استعمالولو روزنه ترلاسه کولی شي.
آژانسونه: ش.ن/ ن.ز