له آلمانه د مجرمو مهاجرو د اخراج په اړه له طالبانو سره خبرې؟
۱۴۰۳ شهریور ۶, سهشنبه
له آلمان څخه د مجرمو او هغو مهاجرو چې خطر ترې متوجې دی، د اخراج په تړاو بحثونو په ترڅ کې د اپوزيسيون پر سياستوالو سربیره اوس د واکمن سوسيال دیموکرات ګوند يو سياستوال هم له طالبانو سره د خبرو اترو غوښتونکی شو.
د آلمان په پارلمان کې د سوسيال ديموکرات ګوند (اس پي ډي) د جناح د بهرني سیاست کارپوه نيلس شمت، د دې پلوی دی چې د آلمان حکومت د مهاجرو د اخراج په برخه کې د طالبانو او د سوریې له حکومت سره خبرې وکړي.
شمت د «آلمان د تحريريه شبکې پلاوي» ورځپاڼې ته وويل: «موږ به ونه شو کړای چې په سوريه کې له رژيم او د طالبانو له رژيم سره د ځانګړو نقاطو لکه د مهاجرو د اخراج په اړه له تخنيکي بحثونو څخه اجتناب وکړو.»
د نوموړي په خبره که څه هم چې له دواړو هیوادونو څخه سفارتي پرسونل د توجیې وړ دلایلو [د امنيتي دلايلو] پر اساس خارج شوی دی، خو له دواړو هېوادونو سره تماس په بشپړه توګه پرې شوی نه دی.
تر دې دمخه په جون میاشت کې د آلمان په منهايم ښار کې د يوه افغان له خوا د چړې تر بريد وروسته چې د يوه پوليس د وژل کیدو باعث شو، د اپوزيسيون د مسيحي ديموکرات ګوند (سي ډي يو) يو شمیر سياستوالو له حکومت څخه غوښتنه وکړه چې د مجرمو او خطر پېښوونکو کسانو د اخراج په موخه «له طالبانو سره تماس» ونيسي.
د آلمان فدرالي حکومت هغه وخت ويلي ول چې د درنو جرمونو ترسره کوونکي مهاجر باید سوریې او افغانستان ته اخراج شي او دا هم ويل شوي ول چې د افغانستان له ګاونديو هېوادونو سره د يو شمير کسانو د اخراج پر امکاناتو هم خبرې کیږي.
د طالبانو ادارې هغه وخت د دريمګړي هېواد له لارې د افغانانو د هر ډول اخراج سره مخالفت څرګند کړی وو او ویلي یې ول چې آلمان باید د «دوه اړخیز توافق» او قونسلي لارو دا مسئله حل کړي.
خو پر دې غوښتنو سربیره هم په آلمان کې په دوامداره توګه د طالبانو له اداري سره د همکارۍ په اړه خبرداری ورکول کیږي او د بشري حقونو څخه د سرغړونو له زياتېدو سره په ځانګړي توګه دښځو له حقونو څخه، د تعامل احتمال وار د واره کموي.
د آلمان د بهرنيو چارو وزيرې انالېنا بېربوک، د طالبانو د امر بالمروف او نهي عن المنکر د نوي قانون په غبرګون کې ويلي ول: «دا کار يو ځل بيا ښيي چې له افراطي اسلامپالو سره هیڅ ډول تماس نه شي رامنځته کیدلای.»
د مجرمو مهاجرو د اخراج بحثونه بيا تازه شوي
د تېرې جمعې بريد په آلمان کې دا بحثونه يو ځل بيا شديد کړي دي. په زولنګن ښار کې د موسيقۍ په يوه فيستيوال کې د چړۍ په دې بريد کې درې کسان وژل شوي او ۸ نور ټپيان شوي دي.
د پېښې شکمن عامل چې د سوريې يو ۲۶ کلن وګړی دی، د شنبې په ورځ ځان پوليسو ته سپارلی دی.
څارنوالي د ترهګرۍ د شک په اړه هم پلټنې کوي. په اصل کې باید دا کس تر دې د مخه بلغاريا ته اخراج شوی وای، خو د اخراج په ورځ یې ځان پټ کړی وو.
د آلمان په پارلمان کې د زرغون ګوند غړې ايرنه مياليچ، وويل چې دا انتظار لري چې «د اخراج د اوسنۍ بڼې موثريت» په دقيقه توګه و ارزول شي. د نوموړې په خبره په دې اړه يوه رښتني بحث ته اړتيا ده چې ولې ډېر اخراجونه نه عملي کیږي.