آئی ایم ایف کے سربراہ کی ضمانت مسترد

آئی ایم ایف کے سربراہ ڈومینیک اسٹراؤس کاہن پر امریکی شہر نیویارک میں مین ہیٹن کے ایک ہوٹل کی ایک ملازمہ سے جنسی زیادتی کی کوشش کا الزام ہے۔ پیر کو امریکہ کی عدالت کے ایک جج نے کاہن کے مقدمے کی سماعت کرنے کے بعد ان کی ضمانت کی اپیل مسترد کردی اور انہیں واپس جیل بھیج دیا۔ کاہن عدالت میں اپنی اگلی پیشی تک جیل ہی میں رہیں گے۔

فرانس سے تعلق رکھنے والے اسٹراؤس کاہن کو ہفتے کی شب اس وقت گرفتار کیا گیا جب وہ امریکہ سے پیرس کی جانب پرواز کرنے والے تھے۔

کاہن کے وکلاء کی کوشش تھی کہ ان کے مؤکل کو ایک ملین ڈالر دے کر ضمانت دلوادی جائے۔ وہ اس بات پر بھی راضی تھے کہ کاہن کو نیو یارک سے باہر نہ نکلنے دیا جائے۔ تاہم جج نے کاہن کے وکیلوں کی یہ درخواست مسترد کردی۔

واضح رہے کہ کاہن اپنے اوپر عائد الزامات کی تردید کر چکے ہیں۔ ان کے وکیلوں کا کہنا ہے کہ کاہن ’فلائٹ رسک‘ نہیں ہیں، اور یہ کہ ان کے خلاف ثبوت ناکافی ہیں، اور ان کو آخرِ کار بری کر ہی دیا جائے گا۔

خیال رہے کہ ہوٹل کی بتیس سالہ افریقی نژاد خاتون نے نیو یارک پولیس کے پاس رپورٹ درج کروائی تھی کہ آئی ایم ایف کے چیف نے ان سے جنسی زیادتی کی کوشش کی تھی۔ اس ہوٹل کے کمرے کا کرایہ تین ہزار ڈالر یومیہ تھا۔

کاہن کی گرفتاری کی خبر سے دنیا بھر میں ہلچل مچ گئی ہے۔ کاہن ممکنہ طور پر فرانس کی حزبِ اختلاف کی جانب سے اگلے صدارتی انتخابات کے لیے امیدوار بھی ہو سکتے ہیں۔ بعض حلقے ان کے خلاف کیس کی نوعیت کو سیاسی قرار دے رہے ہیں۔

آئی ایم ایف کے ترجمان کا کہنا ہے کہ کاہن کی غیر موجودگی میں ادارے کی کارکردگی پہ کوئی فرق نہیں پڑے گا۔

رپورٹ: شامل شمس⁄ خبر رساں ادارے

ادارت: ندیم گِل