ادب و ثقافت کی دنیا، مختصر مختصر

چھ اگست سے سوئٹزرلینڈ کے شہر لوکارنو میں سڑسٹھواں بین الاقوامی لوکارنو فلمی میلہ شروع ہو رہا ہے، جو سولہ اگست تک جاری رہے گا۔ گولڈن لیپرڈ کے اعلیٰ ترین اعزاز کے لیے اس بار سترہ فلمیں مقابلے میں شامل ہوں گی۔ تریاسی سالہ عالمی شہرت یافتہ جرمن اداکار آرمن ملّر شٹاہل کو فلم کے لیے اُن کی عمر بھر کی خدمات کے بدلے میں اعزازی گولڈن لیپرڈ سے نوازا جائے گا۔ اسی طرح اَسّی سالہ پولستانی نژاد فرانسیسی ہدایتکار رومن پولانسکی کو بھی فلم کے لیے اُن کی عمر بھر کی خدمات کے بدلے میں ایک خصوصی اعزاز سے نوازا جائے گا۔

ہسپانوی فنکاروں کا کھلا خط، غزہ میں فوری فائر بندی کا مطالبہ

حال ہی میں اسپین کے ایک سو سے زائد فنکاروں نے ایک کھلے خط میں اسرائیل پر غزہ تنازعے میں قتلِ عام کا الزام عائد کیا۔ ان فنکاروں میں ہالی وُڈ کے فلمی ستارے پینیلوپ کروز اور خاویئر بارڈم بھی شامل تھے۔ اداکاروں کے ساتھ ساتھ موسیقاروں، ادیبوں اور فلم ڈائریکٹرز نے بھی اس کھلے خط میں اسرائیل سے فوری فائر بندی کا مطالبہ کیا۔ اس خط میں، جس پر اسپین کے نامور فلم ڈائریکٹر پیدرو آلمودووار نے بھی دستخط کیے ہیں، ہسپانوی حکومت اور یورپی یونین پر زور دیا گیا کہ وہ غزہ پٹی میں شہری آبادی پر کی جانے والی بمباری کی مذمت کریں۔

فلم بین جسمانی طاقت کی بجائے دماغی طاقت کے مداح نکلے

امریکا اور کینیڈا میں گزشتہ ہفتے ہالی وُڈ ڈائریکٹر لیوک بَیساں کی ریلیز ہونے والی نئی سائنس فکشن فلم ’لُوسی‘ نے پہلے وِیک اَینڈ پر چوالیس ملین ڈالر کا ریکارڈ بزنس کیا ہے۔ صرف چالیس ملین ڈالر کی لاگت سے بننے والی اس فلم میں اداکارہ سکارلیٹ جوہانسن نے ایک ایسی خاتون کا مرکزی کردار ادا کیا ہے، جو اپنے دماغ کا ایک سو فیصدی استعمال کرتے ہوئے حیرت انگیز کارنامے سرانجام دیتی ہے۔

زیادہ کامیاب بزنس کی امید ایکشن فلم ’ہرکولیس‘ سے کی جا رہی تھی جو افتتاحی وِیک اَینڈ پر محض اُنتیس ملین ڈالر کا بزنس کر سکی۔ ایک سو ملین ڈالر کی لاگت سے بننے والی اس فلم میں ہرکولیس کا مرکزی کردار سابق ریسلر اور اداکار ڈوین جانسن نے ادا کیا ہے۔