افغانستان: طالبان کے حملوں میں حکومتی فورسز کی ہزیمت

افغانستان میں حکومت کے ایک سینیئر اہلکار نے سات جون پیر کے روز بتایا کہ حالیہ دنوں میں طالبان کی جانب سے حملوں میں شدت آنے کے بعد سے حکومتی فورسز کی ''حیرت انگیز طور پر'' ہلاکتوں میں اضافہ درج کیا گیا ہے۔

خبر رساں ادارے روئٹرز نے حکومت کے ایک اعلی افسر کے بیان کے حوالے سے اطلاع دی ہے کہ افغانستان کے کل 34 صوبوں میں سے اس وقت 26 صوبوں میں شدید لڑائی جاری ہے۔ اس میں گزشتہ 24 گھنٹوں کے دوران 150 فوجی ہلاک یا پھر شدید طور پر زخمی ہوئے ہیں۔

حکومتی فورسز کے خلاف حملوں میں اس قدر اضافہ ایک ایسے وقت ہوا ہے جب امریکا اور نیٹو سمیت بیرونی افواج تقریباً بیس برس افغانستان میں گزارنے کے بعد وہاں سے نکل رہی ہیں۔ افغان حکومت کی سکیورٹی فورسز اب بھی اتنی مضبوط پوزیشن میں نہیں ہیں کہ وہ طالبان جنگجوؤں کا مقابلہ کر سکیں اور طالبان اسی کا فائدہ اٹھا رہے ہیں۔

طالبان کا مزید اضلاع پر کنٹرول

حکومت کا کہنا ہے کہ حالیہ دنوں میں طالبان کے ساتھ سے جھڑپوں میں زبردست اضافہ ہوا ہے۔ ادھر امریکی افواج کا انخلا جاری ہے جو اس برس 11 ستمبر تک افغانستان سے نکل جائیں گی جبکہ جرمنی سمیت دیگر نیٹو فورسز نے بھی یکم مئی سے اپنی فوجوں کو واپس بلانے کا سلسلہ شروع کردیا ہے۔

افغان حکام کے مطابق جب سے فوجی انخلا کا آغاز ہوا ہے تب سے طالبان نے دو مزید اضلاع پر اپنا کنٹرول حاصل کر لیا ہے۔

ایک سینیئر پولیس افسر کے مطابق اتوار کے روز طالبان نے زبردست حملہ کر کے صوبہ فریاب کے ضلع قیصر پر بھی اپنا کنٹرول حاصل کر لیا جس میں حکومت کے درجنوں فوجی ہلاک ہو گئے۔ اطلاعات کے مطابق حکومتی افواج کو بالآخر پیچھے ہٹنا پڑا اورقریب کی ایک پہاڑی پر پناہ لینی پڑی جس پر کنٹرول کے لیے پیر کی رات تک لڑائی جاری تھی۔

 اتوار کی رات کو ہی طالبان نے مغربی صوبے غور کے ضلع شہرک کو بھی اپنے قبضے میں لے لیا تھا۔ اس لڑائی میں بھی حکومتی فورسز کو زبردست نقصان پہنچا اور اس کے درجنوں فوجی ہلاک ہو گئے۔

  مذاکرات تعطل کا شکار

 تشدد میں اس قدر اضافہ ایک ایسے وقت ہوا ہے جب طالبان اور حکومت کے درمیان بات چیت کا عمل بھی تعطل کا شکار ہے۔ اس کے لیے فریقین ایک دوسرے پر شہریوں پر حملے بند کرنے میں ناکا م رہنے کا الزام عائد کرتے ہیں۔

 مبصرین کو خدشہ اس بات کا ہے کہ اگر طالبان نے ملک پر دوبارہ قبضہ حاصل کر لیا، یا پھر اقتدار میں شریک ہوئے تو پھر خواتین کے حقوق اور دوسرے شہری حقوق کو خطرہ لاحق ہو سکتا ہے کیونکہ طالبان شریعت کی تشریح بہت تنگ نظری سے کرتے ہیں۔

 فوجی ماہرین نے بھی متنبہ کیا ہے کہ حکومتی فورسز کو اچھی طرح سے تربیت نہیں ملی ہے اور نہ ہی ان کے پاس ایسی فوجی صلاحیت اور تکنیک ہے کہ وہ طالبان کا مقابلہ کر سکیں۔

ص ز/ ج ا  (ڈی پی اے، روئٹرز)