افغان حکومت کے طالبان سے خفیہ مذاکرات، امریکا نے تصدیق کر دی

واشنگٹن سے جمعرات اکتیس مئی کو ملنے والی نیوز ایجنسی اے ایف پی کی رپورٹوں کے مطابق پینٹاگون کی طرف سے بتایا گیا ہے کہ حال ہی میں امریکی فوج کے متعدد فضائی حملوں میں 50 سے زائد طالبان شدت پسندوں کی ہلاکت کے باوجود کابل حکومت کے اعلیٰ اہلکاروں اور طالبان کے سرکردہ نمائندوں کے مابین صیغہ راز میں رکھی گئی اس مکالمت میں مرکزی موضوع یہی ہے کہ آیا جنگ زدہ افغانستان میں کوئی فائر بندی معاہدہ طے پا سکتا ہے۔

امریکی فوج کے جنرل جان نکلسن نے پینٹاگون میں مدعو کیے گئے صحافیوں کو کابل سے ایک ٹیلی کانفرنس میں بتایا، ’’(افغانستان میں) اس وقت ظاہری منظر نامے کے پیچھے مکالمت اور کافی زیادہ سفارت کاری جاری ہے۔ یہ کوششیں بیک وقت کئی مختلف سطحوں پر کی جا رہی ہیں۔‘‘

جنرل نکلسن نے کھل کر یہ تو نہیں بتایا کہ کابل حکومت کی طالبان سے اس درپردہ بات چیت میں کون کون شامل ہے تاہم انہوں نے اتنا ضرور کہا کہ اس مکالمت میں طالبان کی طرف سے درمیانے درجے سے لے کر اعلیٰ سطح تک کے نمائندے حصہ لے رہے ہیں۔

اس امریکی جنرل کے بقول اس مذاکراتی عمل کے آغاز سے قبل اطراف کے مابین ایک ابتدائی خفیہ ملاقات ہوئی تھی، جس کے بعد ہی یہ موقع مل سکا کہ اس بات چیت کو آگے بڑھایا جائے۔ ساتھ ہی جان نکلسن نے یہ بھی کہا کہ مستقبل میں کابل حکومت اور افغان طالبان کے مابین اس مذاکراتی عمل کی ممکنہ کامیابی کا انحصار کافی حد تک اس بات پر بھی ہو گا کہ اس ’پورے عمل کو کس حد تک خفیہ‘ رکھا جاتا ہے۔

پینٹاگون کی طرف سے اس تصدیق سے قبل اسی سال فروری میں افغان صدر اشرف غنی نے خود بھی طالبان کو امن مذاکرات کی پیشکش کر دی تھی۔ اس موقع پر غنی نے کہا تھا کہ اگر طالبان ہندوکش کی اس ریاست کے 2004ء میں منظور ہونے والے آئین کو تسلیم کرنے اور ساتھ ہی فائر بندی پر بھی تیار ہو جائیں، تو ان کے ساتھ نہ صرف بات چیت ہو سکتی ہے بلکہ ایسی مکالمت کی تکمیل پر تحریک طالبان کو ایک باقاعدہ سیاسی جماعت بھی تسلیم کیا جا سکتا ہے۔

اشرف غنی کی اس پیشکش کا طالبان نے کوئی فوری لیکن باقاعدہ جواب تو نہیں دیا تھا لیکن گزشتہ برسوں کی طرح اس سال بھی موسم بہار کے آغاز پر انہوں نے ملک کے مختلف صوبوں میں اپنے وہ خونریز حملے تیز تر کر دیے تھے، جنہیں طالبان ’موسم بہار کی جنگی حکمت عملی‘ کا نام دیتے ہیں۔ یہ حملے خاص طور پر دارالحکومت کابل میں بھی کیے گئے تھے، جو اب عام شہریوں کے لیے ملک کا خطرناک ترین شہر بن چکا ہے۔

کئی ماہرین کا خیال ہے کہ افغانستان میں جب تک طالبان کے خلاف کابل حکومت اور امریکا کے دستے زمینی اور فضائی حملے کرتے رہیں گے، تب تک طالبان کی قیادت سے کوئی سنجیدہ بات چیت شروع نہیں ہو سکتی۔

اس کے برعکس جنرل نکلسن، جو طالبان کو بہت زیادہ نقصانات کے ساتھ عسکری دباؤ میں لاتے ہوئے انہیں مذاکرات کی میز کا رخ کرنے پر مجبور کر دینے کی پالیسی پر عمل پیرا ہیں، کہتے ہیں کہ ایسے حالات میں ’طاقت کے استعمال‘ یا ’بات چیت کے ذریعے پیش رفت‘ میں سے کسی ایک کے بجائے ’تشدد اور مکالمت‘ دونوں بیک وقت بھی دو متوازی حقیقتیں ہو سکتی ہیں۔

جنرل جان نکلسن مارچ 2016ء سے افغانستان میں امریکی فوجی دستوں کے اعلیٰ ترین کمانڈر ہیں، جو ہندو کش کی اس ریاست میں امریکی فوجی مشن ’ریزولیوٹ سپورٹ‘ کی قیادت بھی کر رہے ہیں۔

م م / ع ا / اے ایف پی