بھارت میں پرتھوی 2 کا کامیاب تجربہ

بھارت نے جمعرات کو نیوکلیئر ہتھیار لے جانے کی صلاحیت رکھنے والے پرتھوی دو کا مشرقی ساحل پر کامیاب تجربہ کیا ہے۔ بھارتی حکام کے مطابق ریاست اڑیسہ کے علاقے چندی پور میں واقع ایک ٹیسٹ رینج سے فائر کیے جانے والے اس میزائل کا تجربہ کامیاب رہا ہے۔

بھارتی وزارت دفاع کے مطابق، ’’زمین سے زمین تک مار کرنے والے اس میزائل کا تجربہ صبح نو بج کر پانچ منٹ پر کیا گیا اور یہ تجربہ کامیاب رہا ہے۔‘‘ نو میٹر لمبے میزائل کو ٹیٹرا اریکٹر موبائل لانچر سے داغا گیا اور یہ خلیج بنگال میں اپنے درست ہدف تک پہنچا۔

پرتھوی میزائل کا یہ تجربہ ہندوستانی افواج کی میزائل رجمنٹ اور ہندوستان کے دفاعی تحقیق اور ترقی کے ادارے ’ڈی آر ڈی او‘ نے مشترکہ طور پر کیا ہے۔ پرتھوی 2 کا یہ چوتھا کامیاب تجربہ ہے۔ قبل ازیں 2010ء میں بھی پرتھوی 2 کے تجربات کیے گئے تھے۔

بھارت نے پرتھوی سیریز کے پہلے میزائل یعنی پرتھوی ایک کا کامیاب دو ہزار آٹھ میں کیا تھا۔ یہ میزائل 150 سے 250 کلومیٹر کے فاصلے تک مار کر سکتا ہے۔

بھارت اپنی دفاعی صلاحیت مضبوط کرنے کے لیے کئی میزائلوں کی تیاری اور ان میں بہتری لانے میں مصروف ہے۔ بھارت میں یہ میزائل روایتی حریف پاکستان اور چین کی دفاعی صلاحیت کو مد نظر رکھ کر تیار کیے جا رہے ہیں۔

رپورٹ: امتیاز احمد

ادارت: افسر اعوان