بیلجیئم میں برقعے پر پابندی کی منظوری

ووٹنگ میں ایوان زیریں کے 136 ارکان نے حصہ لیا۔ دو ارکان غیرحاضر تھے، جبکہ کوئی بھی ووٹ فیصلے کے خلاف نہیں پڑا۔ پارلیمنٹ کے ایوان بالا کے پاس اس فیصلے پر کسی طرح کا اعتراض اٹھانے کے لئے دوہفتے کا وقت ہے۔

اس پابندی کے نافذ ہونے پر پبلک مقامات پر برقعہ پہن کر جانے، نقاب اوڑھنے یا ایسا کوئی بھی لباس پہننے کی ممانعت ہو گی، جس سے فرد کی مکمل شناخت میں دشواری ہو۔

مسودہ قانون کے مطابق اس پابندی کا اطلاق بازاروں، پارکس، کھیل کے ایسے میدانوں اور عمارتوں پر ہوگا، جو عوام کے استعمال کے لئے مخصوص ہوں یا ان کا مقصد سروسز فراہم کرنا ہو۔

تاہم کارنیوال یا اس نوعیت کے مخصوص مواقع اور تہواروں پر میونسپل حکام چاہیں تو وقتی طور پر پابندی اٹھائی بھی جا سکتی ہے۔

پابندی کی خلاف ورزی کرنے والے کو سات سال تک کی سزائے قید یا 15 سے 25 یورو جرمانہ ادا کرنا پڑے گا۔ یہ دونوں سزائیں ایک ساتھ بھی سنائی جا سکتی ہیں۔ یہ نکتہ بھی قابل ذکر ہے کہ پولیس کی خصوصی اجازت سے ایسا لباس زیب تن کیا جا سکتا ہے۔

بیلجیئم میں حکومتی اور اپوزیشن جماعتیں اس پابندی کے حق میں ہیں۔ ان میں سے بیشتر کا ماننا ہے کہ افراد کی شناخت ان کے لباس سے نہیں ہونی چاہئے۔

لبرل MR پارٹی کے سربراہ ڈانیئل بقلین کا کہنا ہے کہ اس قانون کا مقصد کسی طرح کا امتیازی رجحان متعارف کرانا نہیں بلکہ افراد کو کسی ایک گروپ کے طور پر شناخت کئے جانے کے عمل کو روکنا ہے۔

بیلجیئم میں اور بین الاقوامی سطح پر اس اقدام پر کڑی تنقید کی گئی ہے۔ ایمنسٹی انٹرنیشنل نے اس قانون کے منظور کئے جانے کی مذمت کی ہے۔ مسلم ایگزیکٹو آف بیلجیئم کے ارکان نے کہا کہ ایسی پابندی ایک خطرناک مثال قائم کر سکتی ہے۔ ان کا کہنا ہے کہ چہرے کے نقاب کا تعلق شخصی آزادی سے ہے، جو بیلجیئم، یورپی اور بین الاقوامی قوانین کے تحت ہر شہری کو حاصل ہے۔

واض‍ح رہے کہ بیلجیئم روایتی طور پر ایک کیتھولک ملک ہے اور وہاں کے کیتھولک چرچ نے بھی اس بِل کی مخالفت کی ہے۔ اس کے جنوبی علاقے ٹورنائی کے بشپ گے ہارپگنی کا کہنا ہے، ’کیا ریاست واقعی فرد کے ذاتی اعتقاد کی علامتوں کو کنٹرول کرنے کا حق رکھتی ہے۔؟‘

رپورٹ : ندیم گِل

ادارت : شادی خان سیف