’تمباکو نوشی منع ہے‘، چین میں نئے سخت قوانین

یکم جون پیر کے روز سے نافذ العمل ہونے والے ان قوانین کے تحت جو کاروباری ادارے اپنی حدود کے اندر تمباکو نوشی پر پابندی کی پاسداری کروانے میں ناکام رہیں گے، اُنہیں دَس ہزار یوآن (سولہ سو ڈالر) تک کا جرمانہ کیا جا سکے گا۔ کوئی شخص انفرادی طورپر تمباکو نوشی کرتا پکڑا جائے گا تو اُسے بھی دو سو یوآن کا جرمانہ ادا کرنا پڑ سکتا ہے۔

نیوز ایجنسی اے ایف پی کے ایک جائزے کے مطابق چینی تاریخ میں تمباکو نوشی کے خلاف اتنے سخت قوانین پہلے کبھی بھی متعارف نہیں کروائے گئے لیکن ان قوانین پر عملدرآمد مشکل نظر آتا ہے کیونکہ دنیا میں کسی بھی ملک میں لوگ اتنی زیادہ تمباکو نوشی نہیں کرتے، جتنے کہ چین میں۔

نئے سخت قوانین کے تحت چند ایسی جگہوں پر بھی تمباکو نوشی کی ممانعت ہو گی، جو اسکولوں، ہسپتالوں یا ایسے مراکز سے قریب ہوں گی، جہاں کھیلوں کے مقابلے منعقد ہوتے ہیں۔ اسی طرح کھلے مقامات پر تمباکو نوشی سے متعلق اشتہارات پر بھی پابندی ہو گی۔

ان قوانین پر عملدرآمد کی نگرانی ہیلتھ کمیشن کے انسپکٹرز کریں گے، جو موقع پر جا کر معائنے کریں گے اور عوام کی جانب سے فراہم کردہ معلومات پر کارروائی کریں گے۔ دارالحکومت بیجنگ میں مختلف مقامات پر آویزاں کیے گئے پوسٹرز پر ایک ہاٹ لائن ٹیلیفون نمبر دیا گیا ہے، جہاں عوام فون کر کے تمباکو نوشی سے متعلق قوانین کی خلاف ورزی کرنے والوں کے بارے میں حکام کو اطلاع دے سکیں گے۔ اسی طرح سوشل میڈیا پر ایک نیا اکاؤنٹ بھی بنایا گیا ہے، جس پر تمباکو نوشوں کی تصاویر اَپ لوڈ کی جا سکیں گی۔ یہ وہ تصاویر ہوں گی، جو عام لوگوں نے تب اُتاری ہوں گی، جب اُنہوں نے کسی شخص کو موقع پر ہی پکڑا ہو گا اور تمباکو نوشی کرتے وقت اُس کی تصویر اتار لی ہو گی۔

ایک ایسے سروے کا بھی اعلان کیا گیا ہے، جس میں لوگوں سے یہ پوچھا گیا ہے کہ ہاتھ کا کونسا اشارہ لوگوں کو تمباکو نوشی سے منع کرنے کے لیے موزوں رہے گا۔

چین میں ایسا پہلی بار نہیں ہوا کہ تمباکو نوشی کے خلاف قوانین متعارف کروائے گئے ہوں۔ ابھی 2011ء میں ایسے ہی قوانین نافذ کیے گئے تھے، جن میں جرمانے کی سزا بہرحال شامل نہیں تھی لیکن اُن قوانین پر عملدرآمد نہ ہونے کے برابر رہا۔

ماہرین کے مطابق چین میں تمباکو نوشی کے خلاف قوانین پر عملدرآمد کروانا کافی مشکل ثابت ہو گا۔ اس کی ایک وجہ یہ بھی ہے کہ وہاں کی آبادی میں تمباکو نوشوں کی شرع بہت زیادہ ہے۔ عالمی ادارہٴ صحت کے اندازوں کے مطابق تقریباً 53 فیصد چینی مرد تمباکو نوشی کرتے ہیں۔ ایک اور وجہ سستے سگریٹ ہیں۔ ایک پیکٹ دَس یوآن میں مل جاتا ہے۔

تیسری اور شاید سب سے بڑی وجہ چین کی سرکاری ٹوبیکو انڈسٹری ہے، جس سے چینی معیشت کو مثلاً 2014ء میں ٹیکسوں اور ریونیو کی شکل میں 911 ارب یوآن (146 ارب ڈالر) حاصل ہوئے تھے۔