توہین رسالت و مذہب کے قوانین منسوخ کیے جائیں، یورپی پارلیمنٹ

خبر رساں ادارے اے ایف پی نے اسٹراس برگ سے موصولہ اطلاعات کے حوالے سے بتایا ہے کہ جعمرات 27 نومبر کو یورپی پارلیمنٹ میں ایک غیر پابند قرارداد منظور کی گئی، جس میں حکومت پاکستان سے مطالبہ کیا گیا ہے کہ وہ توہین رسالت اور مذہب کے قوانین اور اس پر عملدرآمد کے طریقہ کار پر جامع نظر ثانی کرے۔ اس قرارداد میں یہ بھی کہا گیا ہے کہ اس مکمل جائزے کے دوران ان قوانین کو منسوخ کرنے پر بھی غور کیا جائے۔

یہ امر اہم ہے کہ یورپی پارلیمنٹ میں متفقہ طور پر منظور کی گئی اس قرار داد پر عملدرآمد لازمی نہیں ہے۔ فرانسیسی حکام نے تحفظات کا اظہار کیا ہے کہ پاکستان میں ایسے قوانین ’احمدیوں، مسیحیوں اور دیگر کمزور اقلیتی گروہوں کا ہدف بنانے کے لیے‘ استعمال کیے جا رہے ہیں۔ اس قرار داد میں حکومت پاکستان پر یہ زور بھی دیا گیا ہے کہ تبدیلی مذہب اور توہین رسالت کے علاوہ دیگر جرائم پر بھی سزائے موت ختم کی جائے۔

یورپی پارلیمان کے ممبران نے بالخصوص آسیہ بی بی کے کیس پر سخت تحفظات کا اظہار کیا ہے۔ اس مسیحی خاتون کو توہین رسالت کے جرم میں چار سال قبل سزائے موت سنائی گئی تھی۔ گزشتہ ماہ لاہور ہائی کورٹ نے آسیہ بی بی کی طرف سے دائر کی گئی اپیل کی درخواست مسترد کر دی تھی، جس کے بعد پیر کے دن اس غیر مسلم خاتون کے وکیل نے سپریم کورٹ میں حتمی اپیل دائر کی۔

جمعرات کے دن ہی یورپی پارلیمنٹ کے تقریباﹰ پچاس ممبران نے یورپی یونین کے خارجہ امور کی سربراہ فیدیریکا موگیرینی کو ایک خط بھی لکھا، جس میں ان پر زور دیا گیا ہے کہ وہ حکومت پاکستان سے کہیں کہ آسیہ بی بی کی سزا معاف کر دی جائے۔

یہ امر اہم ہے کہ پاکستان میں ’توہین مذہب یا رسالت‘ ایک انتہائی حساس معاملہ ہے، یہاں تک کہ ایسے الزامات کے ثابت ہونے سے قبل ہی اس مسلم اکثریتی ملک کے عوام ملزم کو ماورائے عدالت قتل بھی کر دیتے ہیں۔ اس کی ایک تازہ مثال چار نومبر کو رونما ہونے والا وہ واقعہ بھی ہے، جس میں مسلمانوں کے مشتعل ہجوم نے کوٹ رادھا کشن میں ایک مسیحی حاملہ خاتون اور اس کے شوہر کو ہلاک کر دیا تھا، جن پر ایسے ہی الزامات عائد کیے گئے تھے۔