جولائی بھی شدید گرم رہا

یورپ میں سن 2016 میں جولائی کا مہینہ معلومہ تاریخ میں سب سے زیاد گرم خیال کیا گیا تھا۔ عالمی موسمیاتی تنظیم (WMO) کے مطابق رواں برس کے جولائی نے ماحولیاتی تاریخ میں ایک نیا باب رقم کیا ہے۔ یہ جون کے بعد مسلسل دوسرا گرم ترین مہینہ رہا ہے۔

براعظم یورپ میں جولائی کے مہینے میں آنے والی شدید گرمی کی لہر نے مختلف ملکوں کے زیادہ سے زیادہ درجہٴ حرارت کا ایک نیا ریکارڈ قائم کیا۔ ان ملکوں میں بیلجیم، جرمنی، لکسمبرگ، ہالینڈ اور برطانیہ شامل ہیں۔ عالمی موسمیاتی ادارے کے مطابق سن 2015 سے یورپی براعظم کو گرم موسم کا سامنا ہے اور رواں برس تک اس میں تسلسل دیکھا گیا ہے۔

گرمی کی اس لہر کے اثرات گرین لینڈ تک محسوس کیے گئے، جہاں درجہٴ حرارت میں دس سے پندرہ ڈگری سینٹی گریڈ کا اضافہ دیکھا گیا۔ اس گرمی سے گرین لینڈ کی برفانی تہہ بھی معمول سے زیادہ پگھلی۔ اسی کے قریب ہی برفانی خطے قطب شمالی میں پگھلتی برف کی رفتار میں بھی تیزی پیدا ہوئی۔

گرم موسم کی صورت حال پر تبصرہ کرتے ہوئے اقوام متحدہ کے سیکرٹری جنرل انٹونیو گوٹیرش کا کہنا ہے کہ گرمی کا ریکارڈ سب جگہ ٹوٹ گیا ہے، بھارتی دارالحکومت نئی دہلی سے امریکی ریاست الاسکا کا شہر اینکراج کے علاوہ قطب شمالی بھی اس حدت سے براہ راست متاثر دکھائی دیتا ہے۔

گوٹیرش نے نیویارک سٹی میں میڈیا سے گفتگو کرتے ہوئے واضح کیا کہ اگر اب بھی  ماحولیاتی تبدیلیوں کے تناظر میں مثبت اور ضروری عملی اقدامات نہ کیے گئے تو شدید موسمیاتی حالات کا سامنا کرنا پڑے گا۔

ع ح، ع ب، نیوز ایجنسیاں