سری لنکا کے خلاف پاکستانی ٹیم کی نو وکٹوں سے فتح

پاکستانی کرکٹ ٹیم کے کپتان مصباح الحق نے اس جیت کا سہرا پاکستانی ٹیم کی ’مکمل پیشہ ورانہ کارکردگی‘ کے سر باندھتے ہوئے ٹیم کی کارکردگی پر خوشی کا اظہار کیا ہے۔

سری لنکا کے خلاف اس فیصلہ کن جیت میں پاکستانی اوپنر سعید اجمل کی بولنگ نے بھی اہم کردار ادا کیا۔ انہوں نے 68 رنز کے عوض پانچ وکٹیں حاصل کیں۔ انہوں نے اس ٹیسٹ میں مجموعی طور پر آٹھ وکٹیں حاصل کیں۔ سعید اجمل کو میچ کا بہترین کھلاڑی قرار دیا گیا۔

سری لنکا کے کپتان تلکا رتنے دلشان نے ٹاس جیت کر پہلے بیٹنگ کا فیصلہ کیا تھا۔ تاہم ان کا یہ فیصلہ زیادہ کارآمد ثابت نہ ہو سکا اور ان کی ٹیم پہلی اننگز میں مجموعی طور پر 239 رنز بنا کر پویلین واپس لوٹ گئی۔ سعید اجمل نے پہلی اننگز میں بھی تین وکٹیں حاصل کی تھیں۔ عمر گُل نے بھی تین جبکہ جنید خان اور عبدالرحمان نے دو دو وکٹیں حاصل کیں۔

سری لنکا کے 239 رنز کے جواب میں پاکستانی ٹیم نے اپنی پہلی اننگز میں 403 رنز بنائے۔ پاکستانی اننگز کی خاص بات اظہر علی کی سنچری رہی۔

سری لنکن ٹیم دوسری اننگز میں بھی بیٹنگ کے حوالے سے قابل ذکر کارکردگی کا مظاہرہ نہ کر سکی۔ اوپنر تھرنگا پراناویتانا نے سب سے زیادہ 72 رنز بنائے جبکہ 50 کا ہندسہ کراس کرنے والے دوسری سری لنکن بیٹسمین انگلیو میتھیوز تھے جنہوں نے 52 رنز بنائے۔ دوسری اننگز میں سری لنکا کی ٹیم 257 رنز بنا پائی۔

سری لنکا کی دوسری اننگز کے بعد پاکستان کو جیت کے لیے 94 رنز کا ہدف ملا تھا جو اس نے ایک وکٹ کے نقصان پر حاصل کرلیا۔ آؤٹ ہونے والے کھلاڑی اوپنر توفیق عمر تھے جو محض ایک رن بنا کر ہیرتھ کے ہاتھوں بولڈ ہوئے۔ محمد حفیظ نے 59 جبکہ پہلی اننگز میں سنچری اسکور کرنے والے اظہر علی نے 29 رنز بنائے اور ناٹ آؤٹ رہے۔

 اس جیت کے باعث پاکستان کو تین ٹیسٹ میچوں کی اس سیریز میں ایک صفر کی برتری حاصل ہوگئی ہے۔ ابوظہبی میں کھیلا گیا پہلا میچ ڈراء ہوا تھا۔ اس سیریز کا تیسرا اور آخری ٹیسٹ اب تین نومبر کو شارجہ میں شروع ہوگا۔

رپورٹ: افسر اعوان

ادارت: ندیم گِل