شمالی غزہ: اسرائیلی محاصرہ جاری، مزید درجنوں فلسطینی ہلاک

اسرائیلی فورسز نے آج بروز پیر شمالی غزہ میں واقع جبالیہ مہاجر کیمپ میں اپنی کارروائیوں میں مزید شدت لاتے ہوئے متعدد گھروں کو دھماکے سے اڑا دیا اور بے گھر لوگوں کے لیے مختص اسکولوں اور پناہ گاہوں کا محاصرہ کر لیا۔ مقامی رہائشیوں اور طبی عملے کے مطابق اسرائیلی فوجیوں نے مردوں کو  گرفتار کر کے خواتین کو کیمپ چھوڑنے کا حکم دیا۔

 مقامی انڈونیشیا ہسپتال کے طبی ماہرین نےخبر رساں ادارے روئٹز کو بتایا کہ اسرائیلی فوجیوں نے ایک اسکول پر دھاوا بولا اور وہاں موجود افراد  کو حراست میں لے کر عمارت کو آگ لگا دی۔ انہوں نے مزید کہا کہ یہ آگ ہسپتال کے جنریٹروں تک پہنچ گئی اور بجلی کی بندش کا سبب بنی۔

اسرائیلی فوج نے دو ہفتے قبل شمالی غزہ میں ایک نئی فوجی کارروائی شروع کی تھی اور علاقے کے تین ہسپتالوں کو خالی کرنے کا حکم دیا تھا تاہم ان ہسپتالوں میں طبی عملے کا کہنا ہے کہ انہوں نے ہسپتال خالی کرنے سے انکار کر دیا ہے اور یہ کہ اسرائیلی فوجی ہسپتال کے باہر رہے لیکن اندر داخل نہیں ہوئے۔ ایک دوسرے ہسپتال کمال عدوان کے ایک ڈاکٹر نے رات کے وقت ہسپتال کے قریب اسرائیلیوں کی طرف سے بڑے پیمانے پر آگ لگانے کی اطلاع دی۔

انڈونیشیا ہسپتال کی ایک نرس نے اپنا نام ظاہر نہ کرنے کی شرط پر روئٹرز کو بتایا، ''اسرائیلی فوج ہسپتال کے ساتھ والے اسکولوں کو جلا رہی ہے اور کوئی بھی ہسپتال میں داخل ہو سکتا ہے اور نہ ہی باہر جا سکتا۔‘‘

غزہ میں حماس کے زیر انتظام وازرت صحت کے حکام کا کہنا ہے کہ اسرائیلی حملوں میں جبالیہ میں اٹھارہ اور غزہ کے دیگر مقامات پر آٹھ افراد مارے گئے۔ طبی ماہرین نے بتایا کہ غزہ میں دیگر مقامات پر جنوبی شہر رفح میں اسرائیلی حملوں میں کم از کم پانچ اور غزہ شہر میں دو الگ الگ حملوں میں چار افراد ہلاک ہوئے۔

اسرائیلی فوج کا کہنا ہے کہ فوج غزہ کی پٹی میں زمینی کارروائیاں جاری رکھے ہوئے ہے۔ اس نے ایک بیان میں کہا ہے کہ گزشتہ روز فوجیوں نے جبالیہ کے علاقے میں عسکریت پسندوں کے بنیادی ڈھانچے اور سرنگوں کو تباہ کیا اور جنگجوؤں کو ہلاک کیا۔

 بیان میں ہسپتالوں اور کیمپوں کے حوالے سے فوری صورتحال پر کوئی تبصرہ نہیں کیا۔ اسرائیل نے حماس کے رہنما یحییٰ سنوار کی ہلاکت کے بعد ایک سال سے زائد عرصے سے جاری تنازعے کے خاتمے کے لیے جنگ بندی مذاکرات کے آغاز کی امید پیدا ہونے کے بعد سے غزہ اور لبنان دونوں میں اپنی جنگی مہم تیز کر دی ہے۔

شمالی غزہ میں ہسپتالوں سے رابطہ منقطع ہے، اقوام متحدہ

اقوام متحدہ نے کہا  ہےکہ اس کی شمالی غزہ کےتین ہسپتالوں تک رسائی نہیں ہو پا رہی ہے ۔ عالمی ادارے نے شمالی غزہ کے علاقوں میں امداد کی اجازت دینے کے لیے رسائی کا مطالبہ کیا ہے۔ اقوام متحدہ کے انسانی حقوق کے دفتر کا کہنا ہے، '' ہمیں  اسرائیلی فوج  کی شمالی غزہ میں مخاصمانہ کارروائیوں اور اس کے ساتھ انسانی امداد میں غیر قانونی مداخلت اور فلسطینیوں کو جبری بے گھر کرنے اور ان کی تباہی کا باعث بننے والے احکامات پر تشویش ہے۔ غزہ کے شمالی علاقے میں آبادی موت اور بے گھر ہونے کے عمل سے گزر رہی ہے۔‘‘

اسرائیل کا کہنا ہے کہ  غزہ میں زمینی ترسیل اور ہوائی جہازوں کے ساتھ بڑی مقدار میں انسانی امداد پہنچ رہی ہے۔ اس کا یہ بھی کہنا ہے کہ اس نے کمال عدوان ہسپتال سے مریضوں کو نکالنے میں سہولت فراہم کی ہے۔ فلسطینیوں کا کہنا ہے کہ کوئی امداد شمالی غزہ کے ان علاقوں میں داخل نہیں ہوئی، جہاں اسرائیلی فوجی آپریشن فعال ہے۔ رہائشیوں اور طبی ماہرین نے بتایا کہ اسرائیلی فورسز نے جبالیہ کا اپنا محاصرہ سخت کر دیا ہے، جو کہ غزہ پٹی میں واقعہ آٹھ تاریخی پناہ گزین کیمپوں میں سے سب سے بڑا ہے، جسے اسرائیل  نے قریبی قصبوں بیت حنون اور بیت لاہیہ میں ٹینک بھیج کر اور مکینوں کو انخلا کے احکامات جاری کر کے گھیرے میں لے لیا۔

غزہ میں وزارت صحت کا کہنا ہے کہ گزشتہ ایک برس سے جاری جنگ میں غزہ میں ہلاک ہونے والے فلسطینیوں کی مجوعی تعداد بیالیس ہزار چھ سو سے زائد ہو چکی ہے۔ 

ش ر، ع ت، ر ب (اے ایف پی، روئٹرز)