غزہ کی جنگ میں فلسطینی شہری ہلاکتیں: نئی اسرائیلی چھان بین

تل ابیب سے آمدہ رپورٹوں میں خبر رساں ادارے ایسوسی ایٹڈ پریس نے آج اتوار کے روز لکھا ہے کہ اسرائیلی فوج کی طرف سے ہفتے کو رات گئے کیا گیا یہ اعلان بظاہر اس حوالے سے ایک اور کوشش ہے کہ غزہ کی گزشتہ جنگ کے دوران اسرائیلی فوج کی کارروائیوں کی بین الاقوامی تحقیقات سے بچا جا سکے۔

غزہ پٹی کے علاقے میں فلسطینی عسکریت پسند تنظیم حماس اور اسرائیل کے مابین گزشتہ جنگ 50 روز تک جاری رہی تھی۔ اقوام متحدہ اور فلسطینی حکام کے اعداد و شمار کے مطابق اس جنگ میں 2100 سے زائد فلسطینی ہلاک ہوئے تھے، جن میں اکثریت عام شہریوں کی تھی۔ ہلاک ہونے والے ان فلسطینی شہریوں میں سے بھی زیادہ تر خواتین اور بچے تھے۔

اس کے برعکس اسرائیل کا دعویٰ ہے کہ اس جنگ میں مارے جانے والے فلسطینی شہریوں کی تعداد فلسطینیوں اور اقوام متحدہ کے اعداد و شمار سے کہیں کم تھی۔ اس کے علاوہ اسرائیل کی طرف سے یہ الزام بھی لگایا جاتا ہے کہ اس جنگ میں فلسطینی عسکریت پسند تنظیم حماس نے مبینہ طور پر عام شہریوں کو انسانی ڈھال کے طور پر استعمال کیا تھا۔

اس جنگ کے دوران مجموعی طور پر 73 اسرائیلی بھی مارے گئے تھے، جن میں سے 67 فوجی تھے اور چھ عام شہری۔ غزہ کی اس جنگ میں مارے جانے والے زیادہ تر فلسطینی اسرائیلی فورسز کی زمینی اور فضائی کارروائیوں میں ہلاک ہو ئے تھے جبکہ اسرائیل کو پہنچنے والے جانی نقصان کی وجہ زیادہ تر حماس اور دیگر عسکریت پسند فلسطینی تنظیموں کی طرف سے کیے جانے والے راکٹ حملے بنے تھے۔

اسرائیلی فوج کی طرف سے اب تک اس جنگ میں فلسطینی شہری ہلاکتوں کے قریب 100 واقعات کی قانونی تحقیقات کی سفارش کی جا چکی ہے اور ان میں سے فلسطینی ہلاکتوں کے 85 واقعات اس وقت تفتیش کے مختلف مراحل میں ہیں۔

اسرائیلی فوج کے ایڈووکیٹ جنرل کے مطابق غزہ کی گزشتہ جنگ کے دوران فلسطینی شہری ہلاکتوں کے کون کون سے واقعات کی باقاعدہ قانونی چھان بین کرائی جانی چاہیے، اس بات کا فیصلہ حقائق کی تلاش کے ایک ’پیشہ ورانہ طریقہء کار‘ کے تحت کیا گیا۔

اسی جنگ کے دوران اسرائیلی حملوں میں غزہ پٹی کے علاقے میں اقوام متحدہ کے زیر انتظام ایک اسکول سمیت کم از کم چھ مختلف تنصیبات کو بھی نشانہ بنایا گیا تھا، جن میں دو درجن سے زائد افراد ہلاک ہوئے تھے۔