نئی جرمن کابینہ کے لیے ناموں کا اعلان آج

سوشل ڈیموکریٹک پارٹی کی مجلس عاملہ نے آج اتوار کو متفقہ طور پر اُن چھ وزارتوں کے لیے ناموں کی منظوری دے دی، جو مخلوط حکومت میں اس جماعت کو ملی ہیں۔ پارٹی چیئرمین زیگمار گابریل کو اقتصادیات اور توانائی کا قلمدان ملے گا، فرانک والٹر شٹائن مائر وزیر خارجہ ہوں گے، آندریا ناہلیس کو وزیر محنت بنایا جا رہا ہے، ماحول کا شعبہ باربرا ہینڈرکس کے سپرد کیا جائے گا، خاندانی امور کی وزارت مانوئیلا شویزِک سنبھالیں گی جبکہ عدلیہ اور صارفین کے امور کی وزارت ہائیکو ماس کو سونپنے کا فیصلہ کیا گیا ہے۔

یونین جماعتیں اپنے وُزراء کا اعلان شام کو کرنے والی ہیں تاہم خبر رساں ادارے با وثوق ذرائع کے حوالے سے بتا رہے ہیں کہ اب تک کے وزیر داخلہ ہنس پیٹر فریڈرش کو وزیر زراعت ، گیرڈ ملر کو وزیر برائے ترقیاتی امور اور الیگذانڈر ڈوبرنٹ کو نقل و حمل اور وزیر برائے ڈیجیٹل انفراسٹرکچر بنایا جا رہا ہے۔ ان تینوں کا تعلق کرسچین سوشل یونین (سی ایس یُو) سے ہے۔

کرسچین ڈیموکریٹک یونین (سی ڈی یُو) کی جانب سے سب سے غیر متوقع فیصلہ اب تک وزیر محنت اور سات بچوں کی ماں اُرسلا فان ڈیئر لایَن کو جرمنی کی پہلی خاتون وزیر دفاع بنانے کا ہے۔ تاحال وزیر دفاع تھوماس ڈے میزیئر غالباً ایک بار پھر وزارتِ داخلہ سنبھال لیں گے۔ ہیرمان گروہے صحت کے جبکہ یوہانا وانکا تعلیم کی وزیر بن سکتی ہیں۔

آج اتوار کو تمام وُزراء کے ناموں کا اعلان ہو جانے کے بعد کل پیر کو تینوں جماعتوں سی ڈی یُو، سی ایس یُو اور ایس پی ڈی کے قائدین مخلوط حکومت کی تشکیل کے 185 صفحات پر مشتمل معاہدے پر حتمی طور پر دستخط کر دیں گے۔ دستخطوں سے پہلے اس معاہدے میں وُزراء اور اُنہیں دی جانے والی وَزارتوں کا بھی اندراج کیا جائے گا۔

منگل کو جرمن پارلیمان کے ایوانِ زیریں میں ہونے والے اجلاس میں انگیلا میرکل ایک بار پھر خود کو چانسلر شپ کے امیدوار کے طور پر انتخاب کے لیے پیش کریں گی۔ اپنے انتخاب کی صورت میں وہ اُسی روز دوپہر کو تمام وُزراء کے ساتھ اپنے عہدے کا حلف اٹھائیں گی۔