ٹرمپ نے صرف سابق ایف بی آئی سربراہ پر ہی دباؤ نہیں ڈالا تھا

امریکی دارالحکومت واشنگٹن سے بدھ سات جون کو ملنے والی نیوز ایجنسی ڈی پی اے کی رپورٹوں کے مطابق امریکی میڈیا میں یہ نیا انکشاف کیا گیا ہے کہ گزشتہ برس ریپبلکن صدارتی امیدوار کے طور پر ڈونلڈ ٹرمپ کی انتخابی مہم کے سرکردہ اہلکاروں کے روس کے ساتھ ممکنہ رابطوں کی چھان بین، جو اس سال جنوری میں ٹرمپ کے صدر بن جانے کے بعد سے لے کر ابھی کچھ عرصہ پہلے تک جاری تھی اور جس کے لیے اب ایک خصوصی تفتیش کار بھی نامزد کیا جا چکا ہے، کے دوران صدر ٹرمپ نے نہ صرف وفاقی تحقیقاتی ادارے ایف بی آئی کے اس وقت کے سربراہ جیمز کومی پر شدید دباؤ ڈالا تھا بلکہ کئی دیگر اعلیٰ شخصیات بھی ٹرمپ کے اس رویے کا شکار ہوئی تھیں۔

لاوروف سے ملاقات: اسرائیل کا نام نہیں لیا تھا، ٹرمپ کا اصرار

ٹرمپ روس تعلقات: FBI کے سابق سربراہ تحقیقاتی افسر مقرر

اندر کی باتیں میڈیا تک نہ پہنچیں، ٹرمپ کی جیمز کومی کو تنبیہ

ڈی پی اے نے یہ بھی لکھا ہے کہ اسی صدارتی دباؤ کے باعث امریکی وزیر قانون بھی اپنے عہدے سے مستعفی ہونا چاہتے تھے۔ اخبار واشنگٹن پوسٹ نے اپنی ایک رپورٹ میں لکھا ہے کہ ڈونلڈ ٹرمپ نے جیمز کومی کے علاوہ نیشنل سیکرٹ سروس کے ڈائریکٹر ڈینیئل کوٹس پر بھی بہت دباؤ ڈالا تھا۔

واشنگٹن پوسٹ نے اس بارے میں نام لیے بغیر اعلیٰ حکومتی ذرائع کا حوالہ دیتے ہوئے یہ بھی لکھا ہے کہ صدر ٹرمپ نے یہ کوشش بھی کی تھی کہ ’سیکرٹ سروس کی سرکردہ شخصیات کے ذریعے جیمز کومی پر دباؤ ڈالا جائے‘۔ جس وقت ٹرمپ نے جیمز کومی کو ان کے عہدے سے برطرف کیا تھا، اس وقت وہ ٹرمپ کی انتخابی مہم کے روس کے ساتھ ممکنہ رابطوں ہی کی چھان بین کی سربراہی کر رہے تھے۔

ٹرمپ نے ایف بی آئی کے سربراہ جیمز کومی کو برطرف کر دیا

میری شکست میں جیمز کومی اور پوٹن کا ہاتھ ہے، کلنٹن

ایف بی آئی ہلیری کلنٹن پر فرد جرم عائد کرنے کی تجویز نہیں دے گی

ڈی پی اے نے واشنگٹن سے شائع ہونے والے امریکی اخبار کی اس رپورٹ کا حوالہ دیتے ہوئے یہ بھی لکھا ہے کہ جب ٹرمپ کی انتخابی مہم کے عہدیداروں کے روس کے ساتھ مبینہ رابطوں کی چھان بین جاری تھی، تو امریکی صدر کے طور پر ڈونلڈ ٹرمپ کی کوشش تھی کہ یہ تفتیش روک دی جائے۔

اس کے علاوہ ڈونلڈ ٹرمپ نے ایف بی آئی کے سربراہ کے طور پر جیمز کومی سے یہ بھی کہا تھا کہ وہ ٹرمپ کے قومی سلامتی کے سابق مشیر مائیکل فلِن کے خلاف چھان بین روک دیں۔ واشنگٹن پوسٹ کے مطابق ٹرمپ نہیں چاہتے تھے کہ مائیکل فلِن کے حوالے سے کوئی چھان بین کی جائے۔