پاکستان کی جانب سے بھارتی بحريہ کو تنبيہ

پاکستانی نیوی کی جانب سے منگل کو جاری کردہ بیان میں کہا گیا ہے کہ بھارتی آب دوز کو نشانہ نہیں بنایا گیا۔ اس بیان میں لکھا گیا ہے،’’پاکستان کی پالیسی برائے امن جس کے تحت پاکستان نئی دہلی کے ساتھ کشیدگی کم کرنا چاہتا ہے، کو مد نظر رکھتے ہوئے پاکستان نے بھارتی آبدوز کو نشانہ نہیں بنایا۔‘‘

نیوز ایجنسی اے پی کی رپورٹ کے مطابق پاکستانی بحريہ کے اہلکاروں نے بتايا کہ يہ پيش رفت پیر کو پاکستانی سمندری حدود کے قریب ہوئی۔ اس کے فوری بعد بھارتی آبدوز کو خبردار کر دیا گیا اور وہ آب دوز پیچے ہٹ گئی۔

اس معاملے پر ٹویٹ کرتے ہوئے پاکستان کی وزیر برائے انسانی حقوق شیریں مزاری نے اپنی ٹویٹ میں لکھا ہے،’’بھارت کی ایک اور چال کا بروقت پتا چل گیا۔ ایسا معلوم ہوتا ہے کہ بھارتی وزير اعظم نريندر مودی نتائج سے بے خبر جنگ چاہتے ہیں۔‘‘

 

اپوزیشن دشمن کو فائدہ پہنچا رہی ہے، مودی

پاکستان اور بھارت کے درمیان حالیہ کشیدگی 14 فروری سے جاری ہے۔ اس روز بھارت کے زیر کنٹرول کشمیر میں بھارتی نیم فوجی اہلکاروں پر ایک خود کش حملہ کیا گیا تھا جس میں قریب چالیس بھارتی فوجی ہلاک ہو گئے تھے۔ بھارت نے پاکستان کو اس حملے کا ذمہ دار قرار دیا تھا۔ اس حملے کی جوابی کارروائی کرتے ہوئے بھارت نے پاکستان کی فضائی حدود میں داخل ہوتے ہوئے دہشت گرد تنظیم جیش محمد کے ٹھکانوں پر حملہ کرنے کا دعویٰ کيا جبکہ اس کے رد عمل ميں کارروائی کرتے ہوئے پاکستان نے بھارت کے دو طیاروں کو مار گرانے کا دعویٰ کيا۔ دونوں ممالک کے درمیان اب بھی سرحدی اور سفارتی کشیدگی جاری ہے۔