چور نے چوری کے لیے گھر کے تمام افراد کو ہسپتال کیسے بھیجا؟

تل ابیب سے منگل نو فروری کو ملنے والی رپورٹوں کے مطابق اس جرم کا ارتکاب وسطی اسرائیل کے ایک چھوٹے سے شہر میں کیا گیا۔ پولیس نے مشتبہ چور کی گرفتاری کی تصدیق کر دی ہے، جس کی عمر 36 برس بتائی گئی ہے۔

اسرائیل:کورونا ویکسینیشن کی وسیع مہم، فلسطینیوں کی دم توڑتی اُمید

اس ملزم نے ایک گھر میں فون کر کے کہا تھا کہ اس خاندان کے افراد کا مبینہ طور پر کورونا وائرس کے ایک ایسے مریض سے رابطہ ہوا تھا، جس کے بارے میں انہیں علم نہیں تھا کہ تب وہ اس وائرس سے متاثرہ تھا، ''اس لیے محکمہ صحت کے ایک اہلکار کے طور پر اور مروجہ سرکاری ضابطوں کے مطابق میرا یہ فرض ہے کہ آپ کو بتا دوں کہ آپ سب کو فوراﹰ اپنے کورونا ٹیسٹ کروانا چاہییں۔‘‘

فیملی ہسپتال میں، چور گھر میں

اس فون کال کے کچھ ہی دیر بعد جب متعلقہ خاندان کے افراد ایک قریبی شہر میں اپنے کورونا ٹیسٹ کروانے چلے گئے تو ملزم نے اس خاندان کی رہائش گاہ میں نقب لگائی اور وہاں سے نقد رقوم، زیورات اور کئی دیگر قیمتی اشیاء چرانے میں کامیاب ہو گیا۔

اعلی فلسطینی مذاکرات کار کورونا وائرس سے ہلاک

نیتن یاہو کے خلاف اسرائیل بھر میں احتجاجی مظاہرے

اہم بات یہ کہ اس ملزم نے متعلقہ خاندان کے سربراہ سے فون پر بات کرتے ہوئے یہ بھی کہا تھا کہ حکومتی انتظامات کے مطابق اسے اپنے اہل خانہ کے ساتھ ایک چھوٹے سے قریبی شہر کے کس ہسپتال میں جا کر پورے کنبے کے کورونا ٹیسٹ کروانا ہیں۔

چور پکڑا کیسے گیا؟

پولیس کے مطابق اس جرم کا ارتکاب اتوار سات فروری کی شام کیا گیا اور ملزم اس لیے پکڑا گیا کہ اسے متعلقہ رہائش گاہ اور اس کے ارد گرد لگے سکیورٹی کیمروں کی فوٹیج کی مدد سے پہچان لیا گیا تھا۔

ملزم کو اپنے خلاف جن الزامات کا سامنا ہے، ان میں چوری، غلط معلومات پھیلانے اور کورونا کی وبا سے متعلق مجرمانہ غلط بیانی کے الزامات شامل ہیں۔

دنیا کا مہنگا ترین کورونا ماسک کتنے کا؟

اسرائیل میں کورونا وائرس کی وبا کی تیسری لہر

اسرائیل کی مجموعی آبادی تقریباﹰ 9.1 ملین ہے اور مشرق وسطیٰ کے اس ملک کو اس وقت کورونا وائرس کی وبا کی تیسری لہر کا سامنا ہے، جس سے اب یہ بتدریج نکل رہا ہے۔ اسرائیل میں نافذ تیسرا لاک ڈاؤن ابھی پورا ختم نہیں ہوا۔

انسداد کورونا وائرس: یو اے ای کی کمپنی کا اسرائیلی ادارے سے معاہدہ

کووڈ انیس کی وجہ بننے والا کورونا وائرس اب تک اسرائیل میں لاکھوں افراد کو متاثر کر چکا ہے۔ کل پیر آٹھ فروری کو بھی وہ‍اں اس وائرس کے تقریباﹰ آٹھ ہزار نئے کیسز رجسٹر کیے گئے۔ اب تک اسرائیل میں اس مہلک وائرس کے ہاتھوں پانچ ہزار سے زائد افراد ہلاک ہو چکے ہیں۔

م م / ع س (ڈی پی اے)