ہانگ کانگ میں جمہوریت نوازوں کی تحریک کا ایک ماہ

منگل کے روز ہانگ کانگ میں انتظامی معاملات میں مزید جمہوری اصلاحات کے حق میں مظاہرہ کرنے والوں نے شام کے وقت اپنی تحریک کا ایک ماہ مکمل ہونے پر اپنی قوت کا مظاہرہ کیا۔ تقریباً آٹھ نو ہزار افراد اس مظاہرے میں شریک تھے۔ مظاہرین خاص طور پر ایسے ماسک پہنے ہوئے تھے جو انہیں آنسو گیس اور مرچوں کے اسپرے سے محفوظ رکھنے میں مددگار رہے ہیں۔ انہی نقابوں کی وجہ سے وہ گزشتہ ایام کے دوران حکومتی سکیورٹی اہلکاروں کے کریک ڈاؤن کے دوران آنسو گیس کی شیلنگ اور مرچوں کے اسپرے کے دوران بھی خود کو محفوظ رکھنے میں کامیاب رہے تھے۔

منگل کو مظاہرے کی شروعات شام چھ بجے ستاسی سیکنڈ کی خاموشی کے وقفے سے کی گئی۔ خاموشی کا وقفہ شروع ہونے پر بیشتر مظاہرین نے اپنی چھتریوں کو کھول لیا تھا۔ مظاہرین گورنمنٹ ہیڈکوارٹرز میں مرکزی احتجاجی مقام پر جمع تھے۔ ستاسی سیکنڈ سے مراد 28 ستمبر کو مقامی پولیس کی جانب سے پُرامن مظاہرین پر آنسو گیس کی شیلنگ کے ستاسی راؤنڈ تھے۔ اِس ابتدائی حکومتی اقدام کا منفی ردعمل سامنا آیا اور اگلے دنوں میں ہزاروں افراد جمہوریت نوازی کی تحریک میں شامل ہو گئے۔ بعد میں مظاہرین نے حکومتی ہیڈکوارٹرز کے اندر داخل ہو کر دھرنا بھی دیا۔

ایک وقت ایسا بھی آیا جب مظاہرین کی شدت کی وجہ سے امکان پیدا ہو گیا کہ کہیں چینی حکومت سن 1989 میں دارالحکومت بیجنگ کے تیاننمن اسکوائر مظاہرین کو کرش کرنے جیسا خونی ایکشن نہ اٹھا لے۔ ہانگ کانگ میں مظاہرے میں ایک سے زیادہ گروپس شریک ہیں۔ یونیورسٹی طلبا کے ساتھ ساتھ آکُوپائی سینٹرل بھی ایک بڑا متحرک گروپ ہے۔ یہی دو گروپ گزشتہ ایک ماہ کے دوران اختلافات کا بھی شکار ہوئے کیونکہ طلبا کو شکایت تھی کہ اُن کی تحریک کو آکُوپائی سینٹرل نے ہتھیا لیا ہے۔ مظاہرے میں شریک تمام گروپس البتہ اِس پر متفق ہیں کہ ہانگ کانگ میں قائم حکومت حقیقی جمہوری روایات کی حامل نہیں جبکہ بیجنگ حکومت کی حامی مقامی انتظامیہ اِس سے متفق نہیں ہے۔

مظاہرین بیجنگ حکومت سے مطالبہ کر رہے ہیں کہ وہ سن 2017 کے مقامی الیکشن میں ہانگ کانگ کے عوام کو اپنا انتظامی سربراہ چننے کی اجازت دے جبکہ حکومت اسکرینگ کے بعد اپنا من پسند امیدوار کھڑا کرنے کا ارادہ رکھتی ہے۔ بیجنگ حکومت اپنے مؤقف پر قائم ہے اور اب مظاہرین بھی بے یقینی کا شکار ہو گئے ہیں کہ وہ اپنے مقصد کے حصول کو کیسے اور کیونکر حاصل کر سکیں گے۔ احتجاج کے دوران اپنی حفاظت کے نِت نئے طریقے اپنانے پر اِس تحریک کو اب امبریلا (چھتری) موومنٹ قرار دیا جا رہا ہے۔ مظاہرین نے گزشتہ ایک ماہ کے دوران پولیس کی جانب سے آنسو گیس، لاٹھی چارج اور مرچوں کے اسپرے سے محفوظ رہنے کے علاوہ تیز دھوپ اور شدید بارشوں سے بچنے کے لیے بھی چھتریوں کا مسلسل استعمال کیا ہے۔

ہانگ کانگ میں تحریک کا پانچواں ہفتہ شروع ہے۔ طلبا مظاہرین کے لیڈران نے حکومت کے ساتھ مذاکراتی عمل شروع کیا لیکن انتہائی معمولی پیش رفت سامنے آ سکی۔ مجموعی طور پر مظاہرین اور حکومت کے درمیان مذاکرات کا عمل بند گلی میں داخل ہو چکا ہے کیونکہ فریقین اپنے اپنے مؤقف پر ڈٹے ہوئے ہیں۔ گزشتہ اتوار کو تحریک کے حوالے سے عوامی ردعمل کا اندازہ لگانے کے لیے اس تحریکِ جمہوریت کی طرف سے مجوزہ ریفرنڈم کو طلبہ نے رائے شماری کی کوئی نئی تاریخ بتائے بغیر منسوخ کر دیا تھا۔ تحریک میں شامل افراد کو حکومتی پولیس کی جانب سے مختلف سڑکوں پر کھڑی بھاری رکاوٹوں کا بھی سامنا ہے۔