یوکرائنی سرحدوں سے روسی فوج کی واپسی

روسی صدر ولادیمیر پوٹن نے یوکرائن کے ساتھ سرحد کے قریب تعینات ماسکو کے فوجی دستوں کو واپس اپنے اڈوں میں چلے جانے کا حکم دے دیا ہے۔ روسی صدر نے فوجوں کی واپسی سے متعلق بیان میں کییف حکومت کے اپنے مخالفین کے ساتھ شروع کیے جانے والے مذاکراتی عمل کی تعریف بھی کی۔ مبصرین کا خیال ہے کہ روسی صدر کا یہ فیصلہ مصالحتی ضرور ہے لیکن انہوں نے مشرقی یوکرائن میں روسی اثر برقرار رکھنے کے اپنے مقصد کو وہاں فوج بھیجے بغیر ہی حاصل کر لیا ہے۔ مشرقی یوکرائن میں تناؤ اور کشیدگی برقرار ہے۔ کئی علاقوں میں روس نواز باغی بدستور کییف حکومت کے سکیورٹی دستوں کے ساتھ فائرنگ کے تبادلے سے بھی گریز نہیں کر رہے۔

ماسکو سے موصولہ رپورٹوں کے مطابق روسی صدر کا یہ اقدام بظاہر یوکرائن کے تنازعے کی وجہ سے مغربی دنیا کے ساتھ کشیدگی کو کم کرنے اور مزید پابندیوں سے بچنے کی کوشش ہے۔ روس ابھی بھی اس بات کا متمنی ہے کہ یوکرائن مغربی دفاعی اتحاد نیٹو میں شمولیت اختیار نہ کرے اور اپنے ہاں دستوری اصلاحات کے عمل کو مزید آگے بڑھائے۔ اُدھر نیٹو کے سیکرٹری جنرل آندرس فوگ راسموسن نے پیر کی رات کہا کہ نیٹو کو ابھی تک ایسے کوئی شواہد نہیں ملے کہ روس نے یوکرائن کے ساتھ سرحد سے اپنے فوجی دستے ہٹانا شروع کر دیے ہیں۔ مغربی دفاعی اتحاد نیٹو کے سیکرٹری جنرل کا یہ بھی کہنا تھا کہ ماسکو کے ساتھ سیاسی مکالمت کا دروازہ بدستور کھلا ہے۔ راسموسن نے اگلے ہفتے کے دوران نیٹو اور روس کے درمیان ایک خصوصی میٹنگ بھی تجویز کی ہے۔

امریکی دارالحکومت واشنگٹن سے ملکی وزارت خارجہ اور فوجی ہیڈکوارٹرز پینٹاگون کی جانب سے بھی یہی کہا گیا ہے کہ روسی اعلان کے باوجود سرحدوں سے فوجوں کی واپسی دکھائی نہیں دے رہی۔ اِدھر یوکرائن کی وزارت خارجہ نے اپنے بیان میں کہا ہے کہ وہ بھی روسی فوج کی واپسی کے اعلان کا بغور جائزہ لے رہی ہے۔ اس بیان میں اگلے دنوں میں پلان کی گئی فضائی مشقوں کی منسوخی کا بھی مطالبہ کیا گیا ہے۔ جنوب مغربی روس میں ملکی فضائیہ کی مشقیں کل بدھ کے روز سے شروع ہو کر اتوار تک جاری رہیں گی۔ اتوار کے روز یوکرائن میں صدارتی الیکشن کے لیے پولنگ ہو گی۔ روسی فضائی مشقوں میں 70 سے زائد جنگی طیارے شریک ہوں گے۔ ان میں طویل فاصلے تک بمباری کے لیے استعمال کیے جانے والے جدید بمبار طیارے Tu-22M بھی شامل ہوں گے۔ یوکرائن کی وزارت خارجہ کے مطابق روسی فضائیہ کی مشقوں سے کشیدگی بڑھنے کا امکان ہے۔

ولادیمیر پوٹن نے اپنے وزیر دفاع سیرگئی شوئگُو کو حکم دیا ہے کہ موسم بہار کی فوجی مشقوں کے لیے روانہ کی گئی فوج کو واپس اُن کے اڈوں پر لایا جائے۔ یہ فوجیں روسی شہروں روستوف، بیلگوروڈ اوربرائنسک کے علاقوں میں واقع چھاؤنیوں سے مشرقی یوکرائن کی سرحدوں کے قریب پہنچا دی گئی تھیں۔ یوکرائن کے ساتھ انہی روسی علاقوں کی سرحدیں جڑی ہوئی ہیں۔ یہ امر اہم ہے کہ روسی صدر کے حکم میں یہ واضح نہیں کہ کتنے فوجی واپس بلائے جائیں گے۔ اس وقت چالیس ہزار روسی فوجی سرحد پر تعینات ہیں۔