آئی ایس آئی کے سربراہ پاشا امریکہ کے دورے پر

اسلام آباد میں پاکستانی فوج کی بہت طاقتور سمجھے جانے والی اس خفیہ ایجنسی کے ذرائع نے بتایا کہ اپنے اس دورے کے دوران آئی ایس آئی کے سربراہ شجاع پاشا امریکی خفیہ ادارے سی آئی اے کے سربراہ سے تفصیلی ملاقات کریں گے۔ تاہم ان ذرائع نے میڈیا کو اس ملاقات کے ایجنڈے کی کوئی تفصیلات نہیں بتائیں۔

خبر ایجنسی روئٹرز کے مطابق افغانستان میں جنگ اور پاکستان میں طالبان کے مسلح حملوں کے پس منظر میں امریکہ کے لیے پاکستان سے عسکری تعاون انتہائی اہم ہے۔ یہی وجہ ہے کہ پاکستان کو امریکہ کی سربراہی میں دہشت گردی کے خلاف جنگ میں واشنگٹن کا بہت بڑا اتحادی بھی قرار دیا جاتا ہے۔

پاکستانی اور امریکی خفیہ اداروں کے مابین تعاون کو گزشتہ کچھ عرصے کے دوران کافی نقصان بھی پہنچا ہے جس کے باعث ماہرین کے بقول القاعدہ اور طالبان کے خلاف جنگ پر بھی اثر پڑا۔ اب لیفٹیننٹ جنرل شجاع پاشا کا امریکہ کا یہ دورہ اس حوالے سے کیا جا رہا ہے کہ پاکستانی اور امریکی خفیہ اداروں کے درمیان تعاون کو مزید بہتر بنایا جائے۔

صرف آئی ایس آئی اور سی آئی اے ہی نہیں بلکہ پاکستان اور امریکہ کے درمیان کھچاؤ کی ایک بڑی وجہ ریمنڈ ڈیوس کی ذات سے متعلق واقعات بھی تھے۔ سی آئی اے کے لیے کنٹریکٹ پر کام کرنے والے اس امریکی اہلکار نے لاہور میں فائرنگ کر کے دو پاکستانی شہریوں کو قتل کر دیا تھا۔ بعد میں قتل ہونے والے افراد کے اہل خانہ کو خون بہا کی ادائیگی کے نتیجے میں لاہور کی ایک عدالت نے ڈیوس کو رہا کر دیا، جس کے بعد وہ واپس امریکہ جا چکا ہے۔

ریمنڈ ڈیوس کے ہاتھوں دہرا قتل اور پھر اس کی رہائی کا عدالتی فیصلہ پاکستانی عوام اور میڈیا کی جانب سے ISI اور CIA دونوں پر ابھی تک کڑی تنقید کا سبب بنا ہوا ہے۔ ریمنڈ ڈیوس کی رہائی کے بعد پاکستان کے مختلف شہروں میں بہت سے مظاہرے بھی کیے گئے اور احتجاجی ریلیاں بھی نکالی گئی تھیں۔

ڈیوس کی گرفتاری اور پھر رہائی نے پاکستان اور امریکہ کے درمیان تعاون کو اس حد تک متاثر کیا تھا کہ پاکستانی حکومت اور آئی ایس آئی کی اعلیٰ قیادت کو یہاں تک کہنا پڑ گیا تھا کہ اس واقعے نے خفیہ اداروں کی سطح پر پاک امریکہ تعلقات کو متاثر تو کیا ہے تاہم یہ رابطے معطل نہیں ہوئے۔ کسی حد تک بد اعتمادی کی یہ فضا ابھی تک پائی جاتی ہے اور سیاسی اور دفاعی ماہرین کا کہنا ہے کہ جنرل شجاع پاشا کا آج شروع ہونے والا دورہء امریکہ انہی دوطرفہ تعلقات کو بہتر بنانے کی کوشش ہے۔

پاکستانی حکومت نے اپنی دفاعی سیاسی حکمت عملی میں تسلسل کی ضرورت کا حوالہ دیتے ہوئے ابھی حال ہی میں آئی ایس آئی کے سربراہ کے طور پر جنرل پاشا کی مدت ملازمت میں دوسری مرتبہ بھی مزید ایک سال کی توسیع کر دی تھی۔

رپورٹ: عصمت جبیں

ادارت: مقبول ملک