آخری خلائی شٹل اٹلانٹس کی واپسی

شٹل کی اس 135ویں اور آخری پرواز میں بین الاقوامی خلائی اسٹیشن ISS پر ایک سال کا ساز و سامان پہنچایا گیا۔

شٹل کمانڈر کرس فرگوسن نے 1981 سے شروع ہونے والے شٹل پروگرام سے وابستہ ہزاروں کارکنوں کی تعریف کرتے ہوئے کہا، ’’خلائی شٹل نے دنیا اور کائنات کو دیکھنے کا انداز تبدیل کر دیا ہے۔ آج لوگوں کی جانب سے ایک بار پھر دلی جذبات کا مظاہرہ کیا گیا لیکن یہ بات یقینی ہے کہ امریکا اپنا خلائی تحقیق کا پروگرام جاری رکھے گا۔‘‘

پروگرام کے دوران ناسا کی پانچ شٹلز یعنی اٹلانٹس، چیلنجر، کولمبیا، ڈسکوری اور اینڈیور نے انسان کو کائنات کی وسعتوں سے روشناس کرایا۔ ان میں سے کولمبیا 2003 میں جبکہ چیلنجر 1986 میں حادثات کا شکار ہوئیں جن میں عملے کے کل 14 اراکین ہلاک ہوئے۔ اٹلانٹس کو اب فلوریڈا کے کینیڈی خلائی مرکز میں نمائش کے لئے رکھ دیا جائے گا۔ اب دیکھنا یہ ہے کہ شٹل پروگرام کے خاتمے کے بعد امریکی خلائی پروگرام کی کیا سمت متعین ہوگی۔

رپورٹ: حماد کیانی

ادارت: مقبول ملک