اسلامی مہینے رمضان پر بھی یوکرینی جنگ کے اثرات نمایاں

رمضان کا چاند کئی ملکوں میں بشمول سعودی عرب، مصر، شام اور متحدہ عرب امارات میں نظر آنے کے بعد وہاں آج ہفتہ دو اپریل کو پہلا روزہ رکھا گیا۔ پاکستان اور کئی دوسرے ممالک میں تین اپریل کو پہلی رمضان ہو گی۔

رمضان کے مہینے میں مسلمان خاندانوں میں روزہ کھولنے کے وقت خاص طور سے مہمان نوازی کی روایت برسوں سے چلی آرہی ہے کیونکہ اس میں سماجی تعلقات کو دوستانہ بنانے، بھائی چارگی کا اظہار کرنے اور ایک دوسرے کیساتھ مل کر افطار کرنے کو دینی اقدار کا حصہ سمجھا جاتا ہے۔ اس مرتبہ مسلم دنیا کو بھی روس کی یوکرین پر فوج کشی کے نتیجے میں پیدا ہونے والی مہنگائی کا سامنا ہے۔

ساری دنیا میں تیل اور گیس کی قیمتیں مسلسل بڑھ رہی ہیں۔ مسلم معاشرے کورونا وائرس کے پھیلاؤ میں کمی کے بعد رواں برس استقبال رمضان شاندار انداز میں چاہتے تھے لیکن ان کی یہ خواہش بھی خوراک کی قیمتوں میں اضافے کی نذر ہو گئی۔

ٹائلٹ پیپر خریدیں یا میدہ؟ یورپی باشندوں پر جنگ کا خوف طاری

شدید مہنگائی

دنیا کو روس کی یوکرین پر فوج کشی کے بعد پیدا ہونے والی سنگین صورتِ حال کا سامنا ہے۔ پہلے دنیا کے قریب دو ارب مسلمان کووڈ انیس کی وبا کی وجہ سے اپنی خوشیوں کا اظہار نہیں کر سکے اور اب اس یوکرینی جنگ نے بنیادی اشیاء کی قیمتوں میں اضافہ کر دیا ہے۔ ان کے پاس اظہارِ مسرت کا سامان محدود ہو کر رہ گیا ہے۔

یہ ایک حقیقت ہے کہ کئی مسلم آبادی والے ممالک میں متوسط اور کم آمدنی والے طبقے کو مہنگائی کی وجہ سے بنیادی اشیاء کی خریداری میں مشکلات کا سامنا ہے۔

لبنان  کی صورتحال

اقتصادی مشکلات کے شکار مشرقِ وسطیٰ کے ملک لبنان میں رمضان کی آمد پر کسی قسم کی تقریبات کا اہتمام نہیں کیا جا سکا اور لوگ عام ضروریاتِ زندگی کی اشیاء کی قیمتوں میں غیر معمولی اضافے پر حیران رہ گئے۔ گزشتہ دو برسوں سے لبنان شدید ترین معاشی بحران کی گرفت میں ہے اور متوسط طبقہ بھی غربت کی حد کو پار کر گیا ہے۔

ملکی کرنسی کی قدر گرنے کی وجہ سے روزمرہ کی ضرورت کی اشیا کی  قیمتیں عام لوگوں کی برداشت سے باہر ہو گئی ہیں۔ بیروت کے ایک دوکاندار محی الدین بزازو کا کہنا ہے کہ یہ مختلف رمضان ہے کیونکہ گھروں میں بجلی نہیں اور لوگوں کے پاس پیسہ نہیں کہ وہ خریداری کر سکیں۔ بزازو کی گروسری شاپ بھی سابقہ ماہِ رمضان کی طرح بھری ہوئی نہیں۔ ان کا کہنا تھا کہ آٹا بھی دستیاب نہیں اور وہ بلیک مارکیٹ میں بہت مہنگا خرید کر گھر لے کر گئے ہیں۔

مشرقِ وسطیٰ اور یوکرین جنگ

یوکرین میں روس کی فوج کشی نے مشرقِ وسطیٰ کے لاکھوں افراد کی زندگیوں کو مزید مشکل اور پریشانی میں ڈال دیا ہے۔ اس خطے کے کئی ممالک میں اس جنگ سے غربت اور بھوک میں اضافہ ہو گیا ہے۔

اجناس کی برآمدات پر پابندی مہنگائی کا حل نہیں، جرمن وزیر

لبنان، عراق، شام اور یمن کے ملکوں میں بے گھری کے شکار افراد کو ایک وقت کا کھانا بھی مشکل سے میسر ہے۔ یوکرین اور روس سے دنیا کی ایک تہائی گندم اور باجرہ مشرقِ وسطیٰ کے ممالک کو درآمد کیا جاتا تھا۔

اقوام متحدہ کا ادارہ ورلڈ فوڈ پروگرام یوکرین سے ہی اناج خرید کر تنازعات کے شکار ممالک میں لایا کرتا تھا اور ان ادارے کو اس مشکل کا سامنا ہے کہ بنیادی خوراک کے لیے اناج کس ملک سے حاصل کیا جائے۔

مشرقِ وسطیٰ کا ایک اہم ملک مصر ہے اور وہ اپنی ضرورت کی ساری گندم روس اور یوکرین سے خریدا کرتا تھا اور اب جنگ نے اس کی گندم کی خریداری کو قریب قریب ختم کر دیا ہے۔ پہلے ملکی کرنسی کی قدر میں کمی اور اب جنگ نے خوراک کی قیمتوں میں ہوش ربا اضافہ کر دیا ہے۔

فلسطینی علاقے غزہ کے بازاروں میں رمضان کی خریداری کے لیے چند افراد نکلے اور ماضی کی طرح دوکانوں پر رونق جم نہ سکی۔ مقامی فلسطینی کاروباری حضرات کا کہنا ہے کہ روس اور یوکرین کی جنگ نے ہر خوشی کو ماند کر دیا کیونکہ سامان کی دستیابی ممکن نہیں رہی۔

ع ح /ک م (اے پی)