افغانستان: آخری امریکی اور برطانوی دستوں کا آپریشن ختم کرنے کا فیصلہ

ہندو کُش کی ریاست افغانستان میں 13 سال تک امریکا اور اُس کے اتحادیوں کی افواج تعینات رہیں اور وہاں کے مقامی ہیڈ کوارٹرز میں ان ممالک کے پرچم لہراتے رہے۔ ایک عشرے سے زیادہ عرصے کے بعد آج ریجنل ہیڈ کوارٹرز سے برطانیہ اور امریکا کے پرچم اتار لیے گئے ہیں اور دیگر سامانِ حرب کے ساتھ ساتھ ان جھنڈوں کو لپیٹ کر افغانستان سے حتمی انخلاء کی تیاریاں مکمل کر لی گئیں۔

2001ء میں طالبان حکومت کے خاتمے کا سبب بننے والے امریکی فوجی حملے اور امریکا کے ایماء پر شروع ہونے والی اتحادی افواج کی جنگ امریکا کی طرف سے اب تک لڑی جانے والی جنگوں میں طویل تر جنگ ثابت ہوئی ہے۔

افغان صوبہ ہلمند اسٹریٹیجک اعتبار سے اہم ترین صوبہ مانا جاتا ہے۔ یہاں پر قائم غیر ملکی افواج کے فوجی اڈوں سے فوجیوں کے انخلاء کے وقت کو سکیورٹی وجوہات کی بناء پر خفیہ رکھا گیا تھا۔

افغانستان میں ’کیمپ لیدر نَیک‘ سب سے بڑا امریکی فوجی بیس ہے، جسے اتحادی فوج کے مشن کے اختتام پر افغانستان کے سلامتی کے اداروں کے سُپرد کیا جا رہا ہے۔ غیر ملکی افواج کے انخلاء کے بعد ملک میں طالبان بغاوت کا مقابلہ افغان فوج اور پولیس ہی کو کرنا ہو گا۔

اُدھر برطانوی فوج نے بھی اسی وقت اپنے ’کیمپ بیستین‘ کی منتقلی کا کام شروع کر دیا۔ افغانستان کے جنوب مغرب میں کبھی امریکا اور برطانیہ کا مشترکہ فوجی اڈہ ہوا کرتا تھا، جس میں 40 ہزار فوجی تعینات تھے اور یہ اتحادی افواج کا ریجنل کمانڈ بیس تھا۔ کنکریٹ کی دیواریں اور خاردار باڑ اب خالی بیرکس کی حفاظت کر رہی ہیں۔ دفاتر سنسان پڑے ہیں اور بل بورڈز پر امریکی فوجیوں کی تصاویر باقی رہ گئی ہیں۔

امریکی فوج کے ایک کپتان رائن اسٹین برگ کی ٹاسک فورس انخلاء کے کام کی نگرانی کر رہی ہے اور یہی دستہ افغانستان سے سب سے آخر میں نکلے گا۔ اسٹین برگ کہتے ہیں، "اب یہ بالکل خالی ہے، جب میں یہاں آیا تھا، اُس وقت یہاں بہت ہلچل ہوتی تھی۔ بہت سے کارکن اور لوگ ارد گرد ہوا کرتے تھے۔ اب سب کچھ بکھرا ہوا، ٹکڑوں اور حصوں میں نظر آ رہا ہے، نہایت عجیب منظر ہے"۔

تازہ ترین اندازوں کے مطابق اس بیس پر مشترکہ بین الاقوامی فوجیوں کی تعداد ساڑھے چار ہزار تھی۔ ان میں سے جو آخری فوجی بچے ہیں، وہ بھی جلد چلے جائیں گے۔

غیر ملکی افراج کے انخلاء کے بعد افغان نیشنل آرمی کا 215 واں دستہ 6,500 ایکڑ رقبے پر قائم اس ہیڈ کوارٹر میں تعینات ہو گا اور اس طرح ہلمند فوجی بیس میں کوئی غیر ملکی فوجی نظر نہیں آئے گا۔

صوبے ہلمند میں افغانستان کی افیون کی کُل پیداوار کا 80 سے 90 فیصد تک پیدا ہوتا ہے اور افیون کا کاروبار ہی طالبان بغاوت کے لیے مالی وسائل فراہم کرتا ہے۔ اس علاقے میں رواں سال طالبان اور اتحادی افواج کے مابین ضلع سنگین کو افغان فوج اور پولیس کے قبضے سے چھڑانے کے لیے گھمسان کی جنگ ہوتی رہی ہے، جس کی وجہ سے اب افغانستان کی سلامتی کے اداروں کی صلاحیت پر سوال اُٹھ رہے ہیں۔ مثلاً یہ کہ کیا افغان فوج اور پولیس امریکا اور اُس کے اتحادیوں کی انٹیلی جنس اور فضائی مدد کے بغیر طالبان کی بپا کی ہوئی شورش روکنے کی حقیقی معنوں میں صلاحیت رکھتی ہیں؟