اکثر کینسر کی وجہ محض ’بد قسمتی‘

جمعرات کو جاری کردہ ایک تازہ رپورٹ میں ان ماہرین نے اپنی تحقیق کی روشنی میں کہا ہے کہ کینسر کے یہ دو تہائی کیسز موروثی نہیں ہوتے اور نہ ہی ان کا تعلق تمباکو نوشی جیسی عادات سے ہوتا ہے۔ ان ماہرین کا کہنا ہے کہ جسم کے مختلف حصوں میں خلیوں کی تقسیم کے دوران ڈی این اے کے اندر ہونے والی بے ترتیب اور اتفاقی تبدیلیاں سرطان کے زیادہ تر کیسز کی بڑی وجہ ہوتی ہیں۔

نیوز ایجنسی روئٹرز نے واشنگٹن سے اپنے ایک جائزے میں بتایا ہے کہ ان امریکی محققین نے سرطان کی اکتیس اَقسام کا تجزیہ کیا اور یہ پتہ چلایا کہ اُن میں سے بائیس اَقسام کا کینسر خلیوں میں رونما ہونے والی انہی تبدیلیوں کی وجہ سے لاحق ہوتا ہے۔ ان بائیس اَقسام میں لیوکیمیا یعنی خون کا سرطان، لبلبے کا کینسر، ہڈی کا سرطان، بچے دانی کا سرطان اور برین کینسر بھی شامل ہیں۔ اس رپورٹ میں کہا گیا ہے کہ جِلد کے سرطان سمیت باقی ماندہ نَو اقسام کو موروثی کہا جا سکتا ہے یا یہ کہا جا سکتا ہے کہ اُن کی وجوہات میں ماحولیاتی عوامل یا پُر خطر عادات شامل ہوتی ہیں۔

یہ تحقیقی جائزہ ’سائنس‘ نامی جریدے میں شائع ہوا ہے۔ اس جائزے کی نگرانی بالٹی مور میں جونز ہاپکنز یونیورسٹی اسکول آف میڈیسن سے وابستہ ڈاکٹر بیرٹ فوگلشٹائن نے کی۔ وہ کہتے ہیں کہ ’جب لوگ سرطان میں مبتلا ہوتے ہیں تو وہ فوری طور پر جاننا چاہتے ہیں کہ ایسا کیوں ہوا ہے‘۔ اُنہوں نے کہا:’’لوگ یہ سمجھتے ہیں کہ اُن کے کینسر میں مبتلا ہونے کی کوئی ٹھوس وجہ تھی۔ بہت سے کیسز میں اصل وجہ یہ نہیں ہوتی کہ آپ نے کچھ غلط کیا تھا یا آپ کچھ برے ماحولیاتی اثرات کی زَد میں آ گئے تھے بلکہ وجہ محض یہ تھی کہ وہ شخص بدقسمت تھا۔ یہ ایسے ہی ہے کہ کوئی شخص لاٹری میں ہار جائے۔‘‘

اسی ادارے سے وابستہ محقق کرسٹیان ٹوماسیٹی کے مطابق اس مطالعاتی جائزے سے پتہ چلتا ہے کہ کینسر سے بچنے کے لیے جب لوگ اپنا طرزِ زندگی تبدیل کر لیتے ہیں یا تمباکو نوشی جیسی عادات چھوڑ دیتے ہیں تو اُنہیں کینسر کی کچھ مخصوص اَقسام کا شکار ہونے سے بچنے میں تو مدد مل سکتی ہے لیکن اُن کے اس طرزِ عمل سے ضروری نہیں کہ وہ کینسر کی دیگر اَقسام سے بچ جائیں۔

ٹوماسیٹی کے مطابق ایسے میں آئندہ تحقیق اور وسائل کا محو ر مرکز ایسے طریقے تلاش کرنا ہونا چاہیے، جن کی مدد سے اس طرح کے سرطان کی جلد از جلد تشخیص کی جا سکتی ہو۔ اس جائزے میں کینسر کی تمام اَقسام کو شامل نہیں کیا گیا تھا مثلاً چھاتی کے سرطان یا پراسٹیٹ کے غدہ کے کینسر کو اس جائزے میں شامل نہیں کیا گیا تھا۔