جاپان کا زلزلہ اور سونامی دنیا کی مہنگی ترین آفت

جاپانی حکام صورتحال سے نمٹنے کے لیے ہنگامی طور پر اضافی بجٹ اور کارپوریٹ شعبے کے لیے ٹیکس پر چھوٹ کے بارے میں سنجیدگی سے سوچ رہے ہیں۔ ٹوکیو حکومت نے یہ عندیہ بھی دیا ہے کہ عوام میں اس بحران کے بعد جوہری توانائی پر اعتماد اٹھ گیا ہے اور صورتحال قابو میں آنے کے بعد اس پالیسی کا نئے سرے سے جائزہ لیا جائے گا۔

جاپان میں تباہ کن زلزلے اور سونامی کے سبب فوکو شیما کے متاثرہ جوہری بجلی گھر کو ٹھیک کرنے کی کوششوں میں مگن کارکنوں کی زندگیاں خطرے میں پڑ گئی ہیں۔

فوکوشیما سے موصولہ اطلاعات کے مطابق ان میں سے تین کارکن اعلیٰ سطح کی تابکاری کا شکار ہوچکے ہیں جبکہ دو کو زخمی ہونے کے بعد ہسپتال منتقل کیا جاچکا ہے۔ جاپانی میں جوہری سلامتی سے متعلق ادارے کے ایک اعلیٰ عہدیدار نے بتایا کہ ان کارکنوں کے متاثر ہونے کے بعد پلانٹ میں بحالی کی کوششوں میں عارضی التواء کا امکان ہے۔

اس جوہری بجلی گھر کے ری ایکٹر نمبر تین کو بہت زیادہ حساس تصور کیا جارہا ہے جسے ٹھیک کرنے کے لیے 300 انجینئر کام کر رہے ہیں۔

دوسری جانب شمال مغربی جاپان کے اس بحران کے بعد تابکاری کے اثرات اب دارالحکومت ٹوکیو اور اطراف میں واضح ہونے لگے ہیں۔ بیشتر آبادیوں میں نل کا پانی پینے کے لیے غیر موزوں قرار دیا جاچکا ہے۔ امریکہ، آسٹریلیا، سنگاپور اور ہانگ کانگ نے جاپان سے دودھ، سبزی اور پھل کی درآمد پر پابندیاں عائد کردی ہیں۔ جرمنی کے تجارتی بحری جہاز بھی جاپان کے پانیوں کے پاس جانے سے اجتناب کر رہے ہیں۔

جاپانی پولیس حکام نے جاپان میں زلزلے اور سونامی کے بعد دس ہزار ہلاکتوں کی تصدیق کی ہے۔ حکام کے مطابق لاپتہ اور ہلاک ہونے والے افراد کی تعداد ستائیس ہزار سے بھی بڑھنے کا خدشہ ہے۔

جاپان سے متعلق پریشان کُن خبر یہ بھی ہے کہ زلزلے اور سُونامی کی تباہ کاریوں کے تقریباً دو ہفتے بعد ملک کے شمالی حصے میں زلزلے کے نئے شدید جھٹکے ریکارڈ کیے گئے ہیں۔ زلزلے کی شدت ماپنے کے امریکی مرکز کے مطابق اِس زلزلے کی شدت 6.1 ریکارڈ کی گئی۔

رپورٹ: شادی خان سیف

ادارت: امتیاز احمد