جرمن ایئر لائن لفتھانزا ’’گلوبل آئی ٹی بریک ڈاؤن‘‘ کا شکار

 

ڈوئچےلفتھانزا کی فضائی ٹریفک کو شدید تکنیکی خرابی کا سامنا ہے۔  بظاہر، کئی کمپیوٹرز میں نقص آنے کے سبب اب یہ سسٹم کام نہیں کر رہا ہے اور دنیا بھر میں اس کے اثرات مرتب ہو رہے ہیں۔ جرمنی کا ایک مرکزی ہوائی اڈہ 'فرینکفرٹ ایئرپورٹ‘ بند رہے گا۔

ڈوئچے لفتھانزا کے اس ''گلوبل آئی ٹی بریک ڈاؤن‘‘  کی وجہ سے ہزاروں مسافروں کو پروازوں کی تاخیر اور منسوخی کا سامنا کرنا پڑ رہا ہے۔ جرمنی کی قومی ایئر لائن لفتھانزا کے کمپوٹر سسٹم میں یہ نقص بدھ کی صبح پیدا ہوا جس کے سبب بورڈنگ کے لیے کمپیوٹر سسٹم اور دیگر تکنیکی کام مکمل طور پر بند رہے۔ فرینکفرٹ آم مائن کے ہوائی اڈے پر لفتھانزا کی ایک ترجمان کے مطابق، ان کا عملہ اس بڑے تکنیکی نقص کو دور کرنے اور ان مسائل کے حل پر پوری شدت سے کام کر رہے ہیں۔ اس مسئلے سے نمٹنے کے لیے ایک 'بحرانی ٹیم‘ تشکیل دی گئی ہے جس کے اراکین نے ہوائی اڈے پرلفتھانزاکے ہیڈ کوارٹر میں ملاقات کی۔

اس تکنیکی خرابی کے نتیجے میں اب تک نامعلوم تعداد میں پروازیں تاخیر کا شکار یا منسوخ ہو چکی ہیں۔ میونخ اور فرینکفرٹ ہوائی اڈے پر مسافروں اور طیاروں کا رش لگا ہوا ہے۔ مسافروں کی درج شدہ کاغذی فہرست میں ان کے نام موجود ہونے کے باوجود انہیں پرواز کے لیے تیار کھڑے جہازوں پر چڑھنے کی اجازت نہیں تھی کیونکہ عملے کے مطابق ان کی روانگی کے بارے میں اہم معلومات دستیاب نہیں تھیں۔

لفتھانزا کے زمینی عملے کے بیس ہزار کارکنوں کا ہڑتال کا فیصلہ

فرینکفرٹ کی طرف کوئی فلائٹ نہیں

بدھ کو ایئر ٹریفک کنٹرول کے ترجمان نے اس امر کی تصدیق کی کہ جرمن ایئر ٹریفک کنٹرول اب ہوائی جہاز کو فرینکفرٹ ہوائی اڈے کی طرف نہیں بھیج رہا ہے تاکہ وہاں جہازوں کا ٹریفک جام نہ ہو۔  اب تمام جہازوں کو دوسرے ہوائی اڈوں جیسے کہ نیورمبرگ، کولون یا ڈسلڈورف کی طرف موڑا جا رہا ہے۔

تمام اندرونی جرمن پروازوں کو ابتدائی طور پر منسوخ کر دیا گیا تھا اور مسافروں کو ٹرین کا رستہ اختیار کرنے کو کہا گیا۔ اس تکنیکی خرابی کی وجہ ابھی تک واضح نہیں ہے۔ Lufthansa گروپ کی دیگر کمپنیاں بھی متاثر ہوئی ہیں ہیں۔ اس گروپ میں برسلز ایئر لائنز، آسٹرین ایئر لائنز، سوئس انٹرنیشنل اور یورونگز بھی شامل ہیں۔

 

ک م / ع آ (ڈی پی اے، آر ٹی آر)